Шавкат Мирзиёев раислигида 14 апрель куни ўтказилган йиғилишда хориждан кириб келган IТ мутахассислардан фойдаланиш орқали ёш кадрлар салоҳиятини ошириш вазифаси қўйилди. Бу ҳақда президент матбуот котиби хабар қилди.
Қайд этилишича, йиғилишда биринчи ярим йилликда 6 та (Тошкент шаҳри, Қорақалпоғистон, Жиззах, Сирдарё, Фарғона, Наманган), йил якунигача яна 8 та масофавий хизматлар марказини ташкил қилиб, хориждан буюртмалар олишни йўлга қўйиш топширилган. Жаҳон IТ бозорига чиққан камида 30 та йирик компанияларнинг мамлакатда фаолиятини йўлга қўйиш муҳимлиги айтилган.
Энг оғир ҳудудлар — Қорақалпоғистон, Андижон ва Сурхондарёда ахборот технологияларини ривожлантиришга алоҳида эътибор қаратиш лозимлиги кўрсатиб ўтилган. Икки ой муддатда хорижлик мутахассисларни жалб қилган ҳолда амалий лойиҳалар орқали 1 минг нафар ёшларнинг IТ паркларда малакасини ошириш тизимини йўлга қўйиш бўйича топшириқ берилган.
Мавзуга доир:
Изоҳ (0)