Ўзбекистонда вазирлик, қўмита ва вилоят ҳокимликларининг очиқлик индекси бўйича рейтинги эълон қилинди

Ўзбекистон давлат ҳокимияти ва бошқаруви органларининг очиқлик индекси эълон қилинди. Унга кўра, Адлия вазирлиги,  Давлат солиқ қўмитаси, Ёшлар ишлари агентлиги, Давлат тест маркази ва Самарқанд вилояти ҳокимлиги олдинги ўринни эгаллаган.

Давлат ҳокимияти ва бошқаруви органлари фаолиятининг очиқлигини таъминлашни мувофиқлаштириш ва мониторингини олиб бориш бўйича жамоатчилик кенгаши 2021 йил учун очиқлик индексини эълон қилди.

Рейтингда 2022 йил 1 январь ҳолатига кўра, вазирликлар бўйича Адлия вазирлиги энг юқори балл билан (89,22) биринчи ўринни эгаллаган. Иккинчи ўринда Ахборот технологиялари ва коммуникацияларини ривожлантириш вазирлиги (87,44 балл), учинчи ўринда Инновацион ривожланиш вазирлиги (84,16 балл) қайд этилган.

Қўмиталар рейтингида Давлат солиқ қўмитаси биринчи (89,49 балл), Давлат статистика қўмитаси иккинчи (88,90 балл), Давлат божхона қўмитаси учинчи (84,61 балл) ўринни эгаллаган.

Очиқлик индексининг агентликлар бўйича ўтказилган мониторингида Ёшлар ишлари агентлиги биринчи (88,07 балл), «Ўзархив» агентлиги иккинчи (77,74 балл), Адлия вазирлиги ҳузуридаги Давлат хизматлари агентлиги учинчи (76,89 балл) ўринни олган.

Марказлар бўйича Вазирлар Маҳкамаси ҳузуридаги Давлат тест маркази биринчи (83,32 балл), Вазирлар Маҳкамаси ҳузуридаги Ислом цивилизацияси маркази иккинчи (81,07 балл), Республика Маънавият ва маърифат маркази учинчи (78,16 балл) ўринда келтирилган.

Маҳаллий давлат ҳокимияти органлари орасида Самарқанд вилояти биринчи (83,83 балл) ўринни олган. Иккинчи бўлиб Наманган вилояти (79,32 балл), учинчи ўринда Хоразм вилояти (72,38 балл) қайд этилган.

Маълумот учун, 2018 йили эълон қилинган очиқлик индексида ҳам Адлия вазирлиги биринчи ўринни эгаллаган. Ҳокимликлар бўйича эса Тошкент шаҳар ҳокимлиги олдинги ўринда бўлган.