O‘zbekiston davlat hokimiyati va boshqaruvi organlarining ochiqlik indeksi e’lon qilindi. Unga ko‘ra, Adliya vazirligi, Davlat soliq qo‘mitasi, Yoshlar ishlari agentligi, Davlat test markazi va Samarqand viloyati hokimligi oldingi o‘rinni egallagan.
Davlat hokimiyati va boshqaruvi organlari faoliyatining ochiqligini ta’minlashni muvofiqlashtirish va monitoringini olib borish bo‘yicha jamoatchilik kengashi 2021-yil uchun ochiqlik indeksini e’lon qildi.
Reytingda 2022-yil 1-yanvar holatiga ko‘ra, vazirliklar bo‘yicha Adliya vazirligi eng yuqori ball bilan (89,22) birinchi o‘rinni egallagan. Ikkinchi o‘rinda Axborot texnologiyalari va kommunikatsiyalarini rivojlantirish vazirligi (87,44 ball), uchinchi o‘rinda Innovatsion rivojlanish vazirligi (84,16 ball) qayd etilgan.
Qo‘mitalar reytingida Davlat soliq qo‘mitasi birinchi (89,49 ball), Davlat statistika qo‘mitasi ikkinchi (88,90 ball), Davlat bojxona qo‘mitasi uchinchi (84,61 ball) o‘rinni egallagan.
Ochiqlik indeksining agentliklar bo‘yicha o‘tkazilgan monitoringida Yoshlar ishlari agentligi birinchi (88,07 ball), “O‘zarxiv” agentligi ikkinchi (77,74 ball), Adliya vazirligi huzuridagi Davlat xizmatlari agentligi uchinchi (76,89 ball) o‘rinni olgan.
Markazlar bo‘yicha Vazirlar Mahkamasi huzuridagi Davlat test markazi birinchi (83,32 ball), Vazirlar Mahkamasi huzuridagi Islom sivilizatsiyasi markazi ikkinchi (81,07 ball), Respublika Ma’naviyat va ma’rifat markazi uchinchi (78,16 ball) o‘rinda keltirilgan.
Mahalliy davlat hokimiyati organlari orasida Samarqand viloyati birinchi (83,83 ball) o‘rinni olgan. Ikkinchi bo‘lib Namangan viloyati (79,32 ball), uchinchi o‘rinda Xorazm viloyati (72,38 ball) qayd etilgan.
Ma’lumot uchun, 2018-yili e’lon qilingan ochiqlik indeksida ham Adliya vazirligi birinchi o‘rinni egallagan. Hokimliklar bo‘yicha esa Toshkent shahar hokimligi oldingi o‘rinda bo‘lgan.
Izoh (0)