Ўзбекистонда 86 та алоҳида таълимга эҳтиёжи бўлган болаларга таълим бериш муассасалари фаолият юритиб, уларда 28 минг 159 нафар ўқувчи таълим ва тарбия олади. Бу ҳақда 13 апрель куни АОКАда ўтказилган брифингда Халқ таълим вазирлиги ахборот хизмати раҳбари Лайло Рустамова маълум қилди.
Қайд этилишича, мамлакатда 4 та таянч ҳаракати шикастланган ва нутқида нуқсони бор, 14 та кўзи ожиз ва заиф кўрувчи, 18 та кар ва заиф эшитувчи ва 50 та ақли заиф болалар учун ихтисослаштирилган ҳамда 22 та санаторий шаклидаги таълим муассасалари фаолият юритиб келмоқда. Ушбу муассасалар томонидан 8668 нафар ногирон болаларга уйда якка тартибда таълим берилади.
Қайд этилишча, 2021 йилда таълим муассасаларининг моддий-техник базасини мустаҳкамлаш учун давлат бюджети ва ҳомийлар ҳисобидан жами 101,2 миллиард сўм маблағ ажратилган. 2018—2021 йилларда 9 та таълим муассасасида давлат бюджети ҳисобидан 28,9 миллиард сўмлик қурилиш-таъмирлаш ишлари амалга оширилган.
Шунингдек, «Замин» халқаро жамоат фонди ёрдамида кар ва заиф эшитувчи болалар учун таълим муассасаларида замонавий компьютер синф хоналари ташкил этилиб, робототехника жиҳозлари ва ўқув қўлланмалари етказилган. 11 та кар ва заиф эшитувчи болалар учун ихтисослаштирилган мактаб-интернатлари эшитиш учун махсус техник жиҳозлар билан жиҳозланган. Икки минг нафар кар ва заиф эшитувчи болаларга «Замин» халқаро жамоат фонди кўмагида эшитиш мосламалари ўрнатилган.
Бундан ташқари, Тошкент шаҳридаги кўзи ожиз болалар мактаб-интернатида компьютер маркази фаолияти йўлга қўйилган. 14 та кўзи ожиз болалар учун ихтисослаштирилган таълим муассасалари 3 минг дона махсус жиҳозлар (грифел ва прибор) билан таъминланган. Барча муассасалар юқори тезликдаги оптик толали интернет билан таъминланган.
Шунингдек, 2021/2022-ўқув йилининг ўзида 214 нафар касаллиги енгил даражадаги ўқувчилар инклюзив таълимга жалб қилиниб, умумтаълим мактабларига жойлаштирилган. Тажриба-синов тариқасида шаҳарларда ҳамда Тошкент шаҳрининг туманларида жойлашган биттадан умумтаълим мактабларида инклюзив таълим тизими жорий қилинган.
Маълум қилинишича, имконияти чекланган болалар учун ихтисослаштирилган таълим муассасалари ўқувчилари учун 360 номда 324,5 минг нусха дарсликлар чоп этилган. Қўшимча қилинишича, ўқув режа ва дастурлар оптималлаштирилиб, ўртача 12 фоизга қисқартирилган, уйда якка тартибда таълим олувчи ўқувчилар учун жами 11 минг 664 дона ўқув қуроллари етказилган.
Ўқув жараёнини рақамлаштириш, қоғозбозликни камайтириш мақсадида таълим муассасалари рақамли таълим (электрон журнал) платформасига ўтказилган.
Бундан ташқари, 2018—2021 йиллардаги 6 348 нафар битирувчиларнинг 380 нафари касб-ҳунар мактабига, 9 нафари академик лицейга, 62 нафари коллежларга, 23 нафари техникумларга, 240 нафари олий таълим муассасаларига қабул қилинган.
Изоҳ (0)