«Учрашувда президентга арз қилмаганимдан пушаймонман». Самарқандлик тадбиркор хусусий мулки ноқонуний бузилганини айтмоқда

Самарқанд вилоятининг Самарқанд шаҳрида тадбиркорга тегишли бўлган мулк — нотурар жой биноси ҳеч қандай асоссиз бузиб ташлангани айтилмоқда. Бу ҳақда кўплаб масъулларга мурожаат қилган тадбиркор натижага эришмаётганини, давлат раҳбарининг вилоятга ташрифи чоғида учрашган бўлса-да, муаммони айтмаганидан афсусда эканини билдирмоқда.

Маълум бўлишича, Фуқаролик ишлари бўйича Самарқанд шаҳар суди шаҳар ҳокимлиги топшириғи билан шаҳар Ободонлаштириш бошқармаси томонидан 2021 йилнинг сентябрь ойида бузиб ташланган нотурар жой биносини давлат ва жамоат эҳтиёжлари учун олиб қўйиш тўғрисидаги ишни кўриб чиқмоқда. «Дарё» мухбири мазкур воқеа тафсилотларини ўрганди.

«Эзгулик» жамияти билан ҳамкорликда ўтказилган суриштирувда фуқаро Шаҳзод Рашидовга тегишли «Истиқбол» кўчаси 2-А уйдаги ер майдонининг давлат ва жамоат эҳтиёжлари учун олиб қўйилиши ҳамда ушбу хусусий мулк мақомидаги бино-иншоотининг бузиб ташланиши учун ҳеч қандай асос мавжуд эмаслиги аниқланган.

Фуқаролик ишлари бўйича Самарқанд шаҳар суди раиси Тўлқин Усмонов томонидан 2021 йилнинг 20 сентябрь куни чиқарилган ҳал қилув қарорида мулкни давлат ва жамият эҳтиёжлари учун олиб қўйиш ҳақида қарор қилинган. Аммо муҳокама жараёнига хусусий мулк эгаси Шаҳзод Рашидов чақирилмаган. Судья хусусий мулкнинг бузилишига президентнинг «Самарқанд шаҳрида трамвай линиялари қурилиши лойиҳасини амалга ошириш чора-тадбирлари тўғрисида»ги қарорига мувофиқ «Ўзбекистон темир йўллари» АЖ томонидан Самарқанддаги трамвай йўлининг Темир йўл вокзали ҳудудидан «Сиёб» деҳқон бозоригача йўналишида қурилиш ишлари амалга оширилиши белгиланганлиги ҳамда шаҳар ҳокимининг 2017 йил 21 июндаги «Самарқанд шаҳридаги иккинчи босқич трамвай линияси қурилиши муносабати билан Рудакий кўчасида жойлашган турар жой биноларни бузишга рухсат бериш тўғрисида»ги қарорини асос сифатида келтирган.

«Ўзбекистон темир йўллари» АЖ Капитал қурилиш дирекцияси бошлиғи ўринбосари А.Қодировнинг Ўзбекистон инсон ҳуқуқлари «Эзгулик» жамияти сўровига жавобан 2022 йил 5 апрелда берган маълумотига кўра, «Ўзбекистон темир йўллари» АЖ Йўл хўжалиги бошқармаси Самарқанд шаҳридаги трамвай линияси қурилишида бош пудратчи сифатида иштирок этган. Қурилиш 2018 йилда тугалланган бўлиб, ишчи гуруҳ далолатномаси тасдиқланган ва фойдаланишга топширилган.

Жавоб хатига илова қилинган далолатномадан маълум бўлишича, трамвай линияни қуриш ишлари аллақачон тугалланган бўлиб, объектни давлат қабул ҳайъатига топшириш 2018 йилнинг 26 февралида амалга оширилган. Узунлиги 11,4 км трамвай линияси ҳам тўлиқ қуриб битказилган. Шунингдек, шаҳар ҳокимининг 2017 йил 21 июндаги қарорида ҳам на Шаҳзод Рашидов исмини ва на «Истиқбол» кўчаси номини ўқиш мумкин. Шу сабаб судьянинг ўша пайтдаги қарори бекор қилиниб, ҳолат қайта кўриб чиқилмоқда.

Мазкур ҳолатга муносабат билдирган вилоят ҳокимлиги ахборот хизмати раҳбари тадбиркорнинг бузиб ташланган мулки ўрнида Рудакий ҳайкали қад ростлашини айтмоқда.

«Вилоят ҳокимлиги Тожик маданий маркази вакиллари, олимлар ва жамоатчи фаоллар билан маслаҳатлашган ҳолда кўча бошида форс-тожик адабиётининг асосчиси Рудакий ҳайкалини ўрнатиш ташаббусини илгари сурди. Мазкур қурилиш учун вилоят ҳокимлиги инжиниринг компанияси назорати остида ‘Yakhyayev proekt servis’ МЧЖ томонидан лойиҳа ҳам ишлаб чиқилди. Лойиҳа шаҳарсозлик кенгашида кенгаш аъзолари томонидан муҳокама этилиб, тасдиқланди. Ҳомийлик маблағлари эвазига қурилиш ишлари амалга оширилмоқда. Қурилиш ости майдони билан боғлиқ масала эса суд тартибида кўриб чиқилган ва қарор асосида ижро ҳаракати масъул идора томонидан амалга оширилган. Суд қарорда кўрсатилган маблағ ажратилиб бўлингач, қурилиш бошланган», — дейди вилоят ҳокимлиги ахборот хизмати раҳбари Манучеҳр Мирзаев.

Манучеҳр Мирзаев берган маълумот «Истиқбол» кўчасидаги 2-А уйнинг бузилиши Самарқандда трамвай қурилиши эмас балки вилоят ҳокимлиги томонидан илгари сурилган Рудакий ҳайкали сабаб бузилган бўлиши мумкин деган тахминни юзага келтиради. Бироқ, вилоят ҳокимлиги инжиниринг компанияси директори А.Элмуродов мазкур қурилишга инжиниринг компаниясининг ҳеч қандай алоқаси йўқлигини, «Yakhyayev proekt servis» МЧЖ томонидан ишлаб чиқилган лойиҳага ҳам уларнинг дахли йўқлигини айтаётгани яна чалкашликларга олиб келади.

Ўзбошимчалик билан бузилган мулк эгасининг отаси — тадбиркор Шокир Рашидовнинг билдиришича, у оилавий мулкининг ноқонуний бузиб ташланганлиги бўйича 2022 йилнинг февралида Самарқандга ташриф буюрган Ўзбекистон президенти Шавкат Мирзиёевга арз қилмоқчи бўлган. Аммо ушбу масаланинг қонуний тўхтамга келишига умид қилиб, шикоят қилмаган.

«Ноқонуний бузилган мулким бўйича президентга тадбиркорлар учрашуви давомида арз қилмадим ва бундан пушаймонман. Президентдан бошқа ҳеч ким бизга ёрдам бермаяпти ва тадбиркорлар учун жон куйдирадиган бошқа одамни кўрмадим», — дейди Шокир Рашидов.