Венгриянинг OTP Bank’и Ўзбекистонга «Ипотека банк»ни сотиб олиш бўйича битимни кечиктириш илтимоси билан мурожаат қилди. Бу ҳақда банк раҳбари Шандор Чанйи маълум қилди.
Сабаб — Россиянинг Украинага бостириб кириши оқибатлари. Чанйининг сўзларига кўра, келишув деярли тайёр эди, аммо уруш бошланди ва ноаниқлик пайдо бўлди.
Бундан ташқари, 24 февралдан кейин банк акциялари 30 фоизга арзонлашди. Бу Венгриянинг Россия-Украина можаросида тутган позициясининг таъсири — мамлакат расмийлари яқинда Россия газини рублга сотиб олишга тайёр эканликларини эълон қилган, аввалроқ эса Украинага ўз ҳудуди орқали қурол-яроқ етказиб беришни тақиқлаган эди.
Буларнинг келиб чиқиб, банк вазиятни аниқлангунга қадар битимни 2-3 ойга кечиктиришни сўрайди, деб тушунтирди Чанйи.
Венгриянинг OTP Bank’и «Ипотека банк»ни хусусийлаштиришда иштирок этиши 2021 йилнинг кузида маълум бўлган эди. Шартнома 2022 йил бошида имзоланиш кутилган эди.
ОТP Group - молиявий, суғурта, инвестиция ва банк бизнеси соҳаларида - активларни бошқариш ва лизингдан пенсияни молиялаштиришгача бўлган Венгрия банк гуруҳи. Бу Марказий ва Шарқий Европадаги асосий молиявий хизматлар провайдерларидан биридир. Венгриядаги энг йирик банк бўлган OTP Bank гуруҳнинг асосини ташкил қилади.
Изоҳ (0)