UFC 273. Пётр Ян реванш жангида Стерлингга ютқазиб қўйди, Волкановски «кореялик зомби»ни таслим этиб, камарни ҳимоя қилди

АҚШнинг Жексонвилл шаҳрида Тошкент вақти билан 10 апрель тонгида UFC 273 мусобақаси бўлиб ўтди.

Оқшомнинг асосий жанги ярим енгил вазн тоифаси чемпиони Александр Волкановски ва «кореялик зомби» лақабини олган Чон Чҳан Сон ўртасида бўлиб ўтди. Беллашув Волкановскининг мутлақ устунлигида ўтди ва тўртинчи раундга келиб австралиялик яккакурашчи техник нокаут эвазига кореялик рақибини таслим этди.

Мусобақадаги яна бир муҳим жанглардан бири ўта енгил вазн тоифаси чемпиони Алжамейн Стерлинг ва вақтинчалик чемпион Пётр Ян ўртасида кечди. Дастлабки раунд тенг курашлар остида ўтди. Иккинчи ва учинчи раундларни Стерлинг партердаги устунлик эвазига ўз ҳисобига ёздириб қўйди.

Сўнгги икки раундда яққол устунлик Пётр томонида бўлди. Якунда ҳакамларнинг икки нафари Стерлинг фойдасига қарор чиқарди ва Алжамейн камарни ўзида сақлаб қолди.

Эслатиб ўтамиз, улар ўртасидаги дастлабки жангда Пётр катта устунликка эришаётган вақтида тақиқланган зарба йўллаган ва ғолиблик Стерлингга берилганди.

• Александр Волкановски 4-раунддаги тезник нокаут эвазига Чон Чҳан Сонни таслим этди;
• Алжамейн Стерлинг ҳакамлар қарорига кўра Пётр Янни енгди;
• Ҳамзат Чимаев очколар эвазига Гильберт Бёрнсдан устун келди;
• Маккензи Дёрн очколар эвазига Тесиа Торресни мағлуб этди;
• Марк Мадсен ҳакамлар қарорига кўра Винч Пичелни ютди.

• Ян Гарри ҳакамлар қарорига кўра Дариан Уиксни енгди;
• Антони Эрнандес очколар эвазига Жош Фремдни мағлубиятга учратди;
• Рикел Пеннингтон очколар эвазига Аспен Леддни ютди;
• Майк Малотт 1-раунда Микки Галлни нокаутга учратди;
• Алексей Олейник 1-раунддаги сабмишен эвазига Жаред Вандерани таслим этди;
• Пьера Родригес ҳакамлар қарорига кўра Кай Ҳансендан устун келди;
• Хулио Арчи очколар эвазига Дэниэл Сантосни енгди.