Камал Тарихов Қорақалпоғистон суди раиси лавозимига сайланди. Бу ҳақда Жўқорғи Кенгес матбуот хизматига таяниб, «Gazeta.uz» хабар берди.
Қорақалпоғистон Республикаси Жўқорғи Кенгесининг навбатдаги йиғилишида Қорақалпоғистон судининг раисини сайлаш масаласи кўриб чиқилган. Судьялар олий кенгашининг Ўзбекистон президенти билан келишилган хулосаси асосида Жўқорғи Кенгес раисининг таклифига биноан депутатлар Қорақалпоғистон Республикаси суди раиси лавозимига Камал Тарихов номзодини маъқуллаган.
Якунда уни мазкур лавозимга тайинлаш ва 2021 йилнинг февралида суд раиси этиб сайланган Гулнара Базарбаевани вазифасидан озод этиш тўғрисида қарор қабул қилинган.
Камал Тарихов бунга қадар Қорақалпоғистон суди раисининг фуқаролик ишлари бўйича ўринбосари лавозимида фаолият кўрсатган.
Аввалроқ Навоийда одил судловни амалга оширишда қонунийликни бузган судья ишдан олингани, масъулиятсизликка йўл қўйган яна 8 нафар судья жазолангани, Тошкент вилоятида қасамёдини бузган судья лавозимидан озод этилгани тўғрисида хабар берилганди.
Изоҳ (0)