O‘zbekistonda Davlat xaridlari portali yordamida 2021-yilda 5 trillion 786 milliard so‘m mablag‘ iqtisod qilingan. Bu haqda Senat raisi Tanzila Norboyeva Korrupsiyaga qarshi kurashish milliy kengashining navbatdagi majlisida aytib o‘tdi, deb xabar bermoqda “Daryo” muxbiri.
Ma’lum qilinishicha, Davlat xaridlari portali yordamida 2021-yil davomida budjet va korporativ xaridlar bo‘yicha auksion, elektron do‘kon orqali 147 trillion 388 milliard so‘mlik 1,456 milliondan ortiq bitim amalga oshirilib, 5 trillion 786 milliard so‘m mablag‘ iqtisod qilingan.
Bundan tashqari, qonun buzilishi holatlari yuzasidan 272 ta jinoyat ishi ochilib, 508 nafar shaxs javobgarlikka tortilgan. Aniqlangan qonun buzilishi holatlari yuzasidan qo‘zg‘atilgan jinoyat ishlari natijasida davlat manfaatlariga 121,2 milliard so‘mlik zarar yetkazilgan.
“Davlat xaridlari sohasini korrupsiyasiz sohaga aylantirish bo‘yicha 2020-yilda yo‘l xaritasi qabul qilinib, unda belgilangan vazifalarning 30 foizi bajarilmagani aniqlandi. Qolaversa, sohaga oid qonunchilik hujjatlari korrupsiyaga qarshi ekspertizadan o‘tkazilganda 16 ta hujjatning 12 tasida (75 foizi) 46 ta korrupsiyaviy omil mavjudligi ma’lum bo‘ldi”, — deydi Tanzila Norboyeva.
Eslatib o‘tamiz, O‘zbekistonda davlat xaridlari shaffofligini ta’minlashga oid prezident qarori qabul qilingan edi. Qaror bilan davlat xaridlari ochiq va shaffof amalga oshirilishini ta’minlash bo‘yicha respublika komissiyasi to‘g‘risidagi nizom tasdiqlangan, shu bilan birga, davlat xaridlarini amalga oshirish jarayonlari alohida tartibda nazorat qilinadigan ayrim korporativ va budjet buyurtmachilari ro‘yxati ham tuzilgandi.
Izoh (0)