Қирғизистоннинг Боткен вилояти «Маргун» қишлоғида Ўзбекистон томонидан қуриб битказилган мактаб 1 апрель куни фойдаланишга топширилди.
Янги мактабнинг очилиш тантаналарида Ўзбекистон халқ таълими вазири Бахтиёр Саидов, Қирғизистон таълим ва фан вазири Алмазбек Бейшеналиев қатнашди. Очилиш маросимида, шунингдек, онлайн видеоконфренсия тартибида Ўзбекистон бош вазири Абдулла Арипов ва Қирғизистон Вазирлар Маҳкамаси раиси Акилбек Жапаров ҳам қатнашган.
Абдулла Арипов Қирғизистон президентининг чегарадош вилоятлардаги ваколатли вакиллари ҳамда Ўзбекистоннинг чегарадош вилоятлари ҳокимлари кенгашининг тўртинчи йиғилишида иштирок этиш учун Қирғизистоннинг Ўш вилоятида бўлиб турганди.
Қирғизистон Вазирлар Маҳкамаси раиси мазкур мактабнинг очилиши икки халқ ўртасидаги буюк дўстлик рамзи эканини таъкидлаган.
«Икки давлат ўртасидаги икки томонлама ҳамкорлик ривожи кўп йиллик тарихий қардошлик, дўстлик ва яхши қўшничилик ришталари самарасидир. Боткен вилояти Ўзбекистоннинг Фарғона вилояти билан чегарадош ва биз ўзаро манфаатли барча соҳаларда трансчегаравий ҳамкорликни кенгайтириш тарафдоримиз. Ўзбекистон раҳбариятига Боткен вилоятида ушбу таълим муассасасини қуришда кўрсатган ёрдами учун миннатдорчилик билдираман. Бугунги тадбир биродарлик ришталаримиз янада мустаҳкамланиб, ривожланиб бораётганидан далолатдир», — деган Оқилбек Жапаров.
Ўз навбатида Абдулла Арипов бу каби тадбирлар орқали икки қардош халқ ўртасидаги дўстлик янада мустаҳкамланишини таъкидлаб, Қирғизистон га тинчлик ва фаровонлик тилаган.
Маълумот учун, мактаб қурилиши бўйича келишувга Қирғизистон президенти Садир Жапаровнинг 2021 йил 11—12 март кунлари Ўзбекистонга ташрифи чоғида Шавкат Мирзиёевнинг шахсий ташаббуси билан эришилган.
330 ўринли янги мактаб биноси қурилиши 2021 йил июль ойида бошланганди. Лойиҳанинг смета қиймати 3,5 миллион долларни ташкил этиб, ушбу пуллар Ўзбекистон томонидан ажратилган.
Эслатиб ўтамиз, Ўзбекистон 2017 йил октябрида Ўш шаҳрида Алишер Навоий номидаги 18-сонли янги замонавий мактаб-гимназия биносини қуришни бошлаб, уни 2018 йил 1 сентябрда фойдаланишга топширган эди.
Изоҳ (0)