Давлат хавфсизлик хизмати чирчиқлик фуқарони Бухорога бориб, 10 миллион 100 минг сўм миқдоридаги қалбаки миллий валютани 600 долларга сотаётган вақтида қўлга олди. Бу ҳақда ЎзА хабар қилди.
Қайд этилишича, шундан сўнг тезкор тадбир давом эттирилиб, унинг Гулистонда яшовчи жиноий шериги 600 долларни қабул қилиб олган вақтида ушланган. Унинг уйида 2 миллион 150 минг сўм миқдорида қалбаки банкнотлар борлиги аниқланган. Суриштирув давомида пуллар аслида Андижон шаҳрида тайёрланиши маълум бўлган.
Дастлаб Андижонда яшовчи шахс ўзининг Damas машинасида 3 миллион 200 минг сўм миқдоридаги 64 дона 50 минг сўмлик қалбаки банкнотларни олиб кетаётганда ушланган. Сўнгра бу пулларни тайёрловчи яна бир фуқаронинг уйидан пул тайёрлашда керак бўладиган буюмлар ҳамда 14 миллион 550 минг сўм миқдоридаги қалбаки пуллар топилган. Жиноий гуруҳ шу вақтгача жами 300 миллион сўмдан ортиқ қалбаки пулларни Андижон, Наманган ва Фарғона вилоятлари ҳамда Тошкент шаҳрида муомалага киритишга улгурган.
Ҳолат юзасидан мазкур шахсларга нисбатан Жиноят кодексининг 176-моддаси (қалбаки пул, акциз маркаси ёки қимматли қоғозлар ясаш, уларни ўтказиш) билан жиноят иши қўзғатилган. Ҳозирда тергов ҳаракатлари олиб борилмоқда.
Аввалроқ Тошкентда қалбаки 5 минг долларни муомалага киритаётган шахслар ушлангани хабар қилинганди. Шунингдек, Андижонда қалбаки 100 миллион сўм купюраларни сотишга уринган шахслар қўлга олингани, Тошкент вилоятида қалбаки 100 минг сўмлик купюраларни тайёрлаш билан шуғулланган оила аниқлангани ҳақида хабар берилган.
Изоҳ (0)