Озарбайжон Мудофаа вазирлиги Тоғли Қорабоғда ўт очишни тўхтатиш ҳақидаги келишув шартларини бузганини рад этмоқда. Келишув Озарбайжон ва Арманистон ўртасида 2020 йилнинг ноябрь ойида Россия воситачилигида имзоланганди.
«Мудофаа вазирлиги Озарбайжон 2020 йил 10 ноябрдаги уч томонлама баёнотга содиқлигини ва унинг қоидаларини бузмаганини билдиради», — дейилади вазирлик баёнотида.
Шу тарзда Озарбайжон Мудофаа вазирлиги ўз қўшинларини тан олинмаган Тоғли Қорабоғ республикасидан олиб чиқиш ҳақидаги Россиянинг чақириғига жавоб қайтарган. 26 март куни Россия Мудофаа вазирлиги Озарбайжон қуролли кучлари Россиянинг Тоғли Қорабоғдаги тинчликпарвар миссиясининг назоратидаги зонага кириб, тан олинмаган республика армияси бўлинмаларига ҳужум уюштирганини маълум қилди.
Боку вазият «Россия тинчликпарвар контингенти вақтинча жойлаштирилган Озарбайжон ҳудудида» кескинлашганини айтди. Озарбайжон Мудофаа вазирлиги Россиядан «Тоғли Қорабоғ» иборасини ишлатмасликни ва Озарбайжон ҳудудлари номини тўғри кўрсатишни сўради.
Озарбайжон Россияни «уч томонлама баёнот қоидаларига мувофиқ, халқаро ҳамжамият томонидан тан олинган Озарбайжон ҳудудларидан Арманистон армиясининг қолган қисмлари ва ноқонуний арман қуролли тузилмалари тўлиқ олиб чиқилишини таъминлашга» чақирди.
Арманистон ҳукуматининг иддао қилишича, 24 март куни Озарбайжон ҳарбийлари Россия тинчликпарвар кучларининг назоратидаги тўқнашув чизиғини бузиб, Тоғли Қорабоғдаги Парух қишлоғига бостириб кирган. Тан олинмаган республика Мудофаа вазирлиги 25 март куни отишма содир бўлгани, уч қорабоғлик ва беш нафар озарбайжонлик ҳарбий ҳалок бўлганини маълум қилди. Тоғли Қорабоғда ҳарбий ҳолат жорий этилди.
2020 йил сентябрь ойи охирида Тоғли Қорабоғда кўп йиллар давомида биринчи марта кенг кўламли ҳарбий ҳаракатлар бошланганди. Улар бир ярим ой давом этди; 10 ноябрь куни томонлар Россия воситачилигида ўт очишни тўхтатиш тўғрисида келишувга эришди. Жанглар натижасида Арманистон Тоғли Қорабоғ республикасининг қарийб ярмини Озарбайжонга қайтарди. Россия Тоғли Қорабоғга тинчликпарвар контингентини юборди.
Мавзуга доир:
- Илҳом Алиев чегарадаги отишма оқибатида саккиз нафар арман ҳарбийси ҳалок бўлганини маълум қилди
- Путин, Пашинян ва Алиев Сочида уч соатли учрашув ўтказди. Улар Арманистон ва Озарбайжон чегараларини делимитация қилиш бўйича комиссия тузишга келишиб олган
- Арманистон-Озарбайжон чегарасида яна тўқнашувлар кузатилди. Асосий маълумотлар
Изоҳ (0)