Toshkentdan Qozon va Novosibirsk shaharlariga qo‘shimcha aviaqatnovlar amalga oshiriladi

Yo‘lovchilar orasida talab ortishi munosabati bilan Toshkent shahridan Rossiyaning Qozon va Novosibirsk shaharlariga qo‘shimcha aviaqatnovlar amalga oshiriladi. Bu haqda Uzbekistan Airways xabar qildi.

Qayd etilishicha, Toshkent—Qozon—Toshkent yo‘nalishi bo‘yicha qo‘shimcha parvozlar 13, 16, 20 va 23-mart kunlari tashkil etiladi. Toshkent—Novosibirsk—Toshkent yo‘nalishi bo‘yicha reyslar esa 15 va 22-mart kunlari uchadi.

Avvalroq 13 va 20-mart kunlari Toshkent—Yekaterinburg—Toshkent yo‘nalishi bo‘yicha, 9, 16 va 23-mart kunlari Toshkent—Novosibirsk—Toshkent yo‘nalishi bo‘yicha ham qo‘shimcha aviaqatnovlar joriy etilishi xabar qilingandi. Bundan tashqari, 9-martdan 14-martgacha Toshkent—Moskva—Toshkent yo‘nalishi bo‘yicha qo‘shimcha reyslar, 11, 13 va 14-mart kunlari Toshkent—Sankt-Peterburg—Toshkent yo‘nalishi bo‘yicha parvozlar amalga oshiriladi.

Eslatib o‘tamiz, Uzbekistan Airways esa Rossiya havo hududining bir qismi yopilishi bilan bog‘liq cheklov sabab bir qator shaharlarga parvozlar jadvali va yo‘nalishini o‘zgartirdi. Unga ko‘ra, 3-martdan 26-martgacha O‘zbekiston—Sochi—O‘zbekiston yo‘nalishida qo‘shimcha qatnovlar joriy etilib, Krasnodar va Rostov-Don shaharlariga rejalashtirilgan parvozlar Sochi shahriga amalga oshiriladi.

Shuningdek, Rossiyaning iFly aviakompaniyasi 5-mart sanasidan boshlab O‘zbekistonga bajarilishi kutilayotgan hamda barcha rejalashtirilgan yo‘nalishlarda o‘z parvozlarini noma’lum muddatga to‘xtatgandi. Shuningdek, Smartavia aviakompaniyasi ham 7-mart kuniga rejalashtirilgan Moskva—Urganch—Moskva yo‘nalishidagi parvozni bekor qildi.