Европа тикланиш ва тараққиёт банки Ўзбекистондаги қайси соҳаларга сармоялар киритишини маълум қилди

Ўзбекистонда келгуси 5 йил ичида барқарор иш ўринлари яратиш, хизматлар соҳаси ва рақамлаштиришни ривожлантириш муҳим аҳамиятга эга. Бу ҳақда Европа тикланиш ва тараққиёт банки (EТТБ) президенти Одиль Рено-Бассо Тошкент шаҳрида ўтказилаётган халқаро инвестиция форумида айтиб ўтди, дея хабар бермоқда «Дарё» мухбири.

Одиль Рено-Бассонинг таъкидлашича, EТТБ келгуси 5 йилда Ўзбекистондаги 3 та устувор йўналиш ривожи учун сармоялар ажратади.

«Европа тикланиш ва тараққиёт банки Ўзбекистон иқтисодиётига ўтган 5 йил давомида 3 миллиард 300 миллион доллар миқдорида инвестиция қилди. 2021 йилнинг ўзида 600 миллион доллардан ортиқ инвестиция йўналтирилди. Биз нафақат инвестиция, балки иқтисодий ислоҳотлар, хусусий секторга ёрдам бериш, бизнес бўйича маслаҳатлар бериш ва тренингларни амалга ошириш бўйича ҳам иш олиб бормоқдамиз.

Келгуси 5 йилда қилиниши зарур бўлган ишлар ҳақида гапирганда 3 та устувор йўналишга эътибор беришимиз керак деб ўйлайман.

Биринчидан, барқарор иш ўринлари яратиш энг муҳим масалалардан.

Иккинчидан, хизматлар сифати ва турларини ошириш ҳамда Ўзбекистоннинг кейинги авлодлари учун хизмат қиладиган соғлом яшил муҳитни яратиш.

Учинчидан, рақамлаштириш ва рақобатбардошликни ошириш лозим», — деди EТТБ президенти.

Одиль Рено-Бассонинг айтишича, EТТБ мамлакатдаги мазкур йўналишларга инвестиция киритишни мақсад қилган.

«Биз Ўзбекистонда кичик ва ўрта бизнесни молиялаштиришни давом эттирамиз. Яшил иқтисодиётга ҳам алоҳида эътибор қаратамиз. Шунингдек, янги маҳсулотлар ишлаб чиқаришда ёш тадбиркорларга молиявий кўмак берамиз.

Барқарор иш ўринлари яратишда бир неча омилларга эътибор қаратиш керак деб ўйлайман. Жумладан, хусусийлаштиришга. Бу айниқса банк соҳасида муҳим аҳамиятга эга. Албатта, мазкур соҳани ҳам молиялаштиришга эътибор қаратамиз. Иш ўринлари яратишда тўғридан-тўғри хорижий инвестицияларга, бизнесга яхши муҳит яратиш муҳим. Айниқса, шаффоф трансформация инвесторларни ўзига жалб қилади. Биз ўзбекистонлик ҳамкорлар билан рақамлаштириш йўналишида таълимни ривожлантиришга алоҳида эътибор қаратяпмиз. Энергетика соҳасига ҳам инвестициялар қилмоқдамиз.

Тўғри, ҳозирда бир қатор қийинчиликларни бошдан кечирмоқдамиз. Бунда ноаниқликлар жуда ҳам катта. Мана шундай қийин даврда ҳам ўзбекистонлик ҳамкорларимиз ёнида эканимизни айтмоқчимиз», — деди Одиль Рено-Бассо.

Форумда иштирок этган Ўзбекистон президенти Шавкат Мирзиёев Одиль Рено-Бассо фикрларини қўллаб-қувватлашини билдирди.

«Айтган таклифларингиз, айниқса, аҳолини барқарор иш билан таъминлаш, кичик ва ўрта бизнесни, хусусий секторни қўллаб-қувватлаш чиндан ҳам жуда муҳим. Биз хусусий секторга жуда кўп имкониятлар яратдик. Сизнинг банкингиз билан бизнинг тадбиркорлар иш тизими ижобий томонга ўзгарди», — деди президент Шавкат Мирзиёев.