Ички ишлар вазирлиги «Йўл-патруль хизмати ходимларининг йўл ҳаракати қатнашчилари билан ўзаро муносабатлари ҳамда махсус мосламалардан фойдаланиши тартиби тўғрисидаги низомга қўшимча киритиш тўғрисида»ги Вазирлар Маҳкамаси қарори лойиҳасини муҳокамага қўйди.
Қарор лойиҳасида Йўл-патруль хизмати ходимларининг йўл ҳаракати қатнашчилари билан ўзаро муносабатлари ҳамда махсус мосламалардан фойдаланиши тартиби тўғрисидаги низомга қўшимча киритиш таклиф этилган.
Унга кўра, Вазирлар Маҳкамасининг 2018 йил 1 декабрдаги 975-сон қарори билан тасдиқланган Йўл-патруль хизмати ходимларининг йўл ҳаракати қатнашчилари билан ўзаро муносабатлари ҳамда махсус мосламалардан фойдаланиши тартиби тўғрисидаги низомнинг 19-бандининг олтинчи хатбошиси қуйидагича тўлдирилади: «ЙПХ ходимининг ўз хизмат вазифаларини бажариши билан боғлиқ ҳолатда олинган фото ва видео тасвирларини унинг рухсатисиз интернет жаҳон ахборот тармоғида жойлаштирмаслик».
Қарор лойиҳаси муҳокамаси 29 март кунигача давом этади.
Аввалроқ Тошкент вилоятида ЙПХ ходими хизмат вақтида ухлаб ётгани акс этган видеолавҳа тарқалган эди. Йўл ҳаракати хавфсизлиги хизматининг маълум қилишича, транспорт воситаларининг тезлигини қайд қилувчи махсус автоматлаштирилган радар мосламаси билан жиҳозланган Nexia-3 хизмат автомобилида ЙПХ ходими Б.А. ухлаб ётгани номаълум фуқаро томонидан видеотасвирга олинган ва ижтимоий тармоқда тарқатилган.
Изоҳ (0)