2021 йилнинг ноябрида Бухоро вилояти Ғиждувон туманида 70 ёшли М.А. қўшни аёлни ўткир тиғли ўроқ билан жароҳатлаб, унинг қотилига айлангани тўғрисида хабар берилганди. «Zo‘r TV» телеканалининг «Бу кун» дастурида маълум қилинишича, жиноят ишлари бўйича Вобкент туман судида судланувчига нисбатан ҳукм ўқилган.
2021 йилнинг 24 ноябрь куни «Гаждумак» маҳалласида ободонлаштириш ишлари олиб борилган. Фуқаро М.А. соат тахминан 08:30 ларда дарахтларни буталашга чиққан. Шу вақтда 55 ёшли қўшни аёл Ж.М. у буталаётган дарахт ўзига тегишли эканини айтиб, дарахт таналарини ноўрин кесаётганига эътироз билдирган. Икки қўшни ўртасида ўзаро жанжал бошланган. М.А. эса жаҳл устида қўлидаги иш қуроли – ўткир тиғли ўроқ билан Ж.М.нинг чап кўкрак соҳасига бир маротаба қасддан қаттиқ жароҳат етказган. Оқибатда аёл олган тан жароҳати натижасида воқеа жойида вафот этган.
Маълум қилинишича, икки қўшни ўртасида аввалдан ўзаро келишмовчилик бўлиб келган. Ҳар икки оила ҳам 2014 йилдан буён маҳалла фуқаролар йиғинидаги нотинч оилалар рўйхатида туради.
Суд судланувчи М.А.га нисбатан жазо тайинлашда унинг 71 ёшда экани, қилмишидан чин кўнгилдан пушаймонлиги ва айбига тўлиқ иқрорлиги, шунингдек, ижобий ўтмишини инобатга олган. Унга нисбатан Жиноят кодексининг 97-модда (қасддан одам ўлдириш) 1-қисми билан 8 йил озодликдан маҳрум қилиш жазоси тайинланган.
Аввалроқ Тошкентдаги «Малика» савдо мажмуасида сотувчини пичоқлаб ўлдирган йигит 10 йилга қамалгани, Навоийда куёвини пичоқлаб ўлдирган қайнота 10 йилга озодликдан маҳрум этилгани, Андижонда 32 ёшли фуқаро қарзини сўраб келган аёлни пичоқлаб ўлдиргани тўғрисида хабар берилганди.
Изоҳ (0)