Россияда мамлакат ички ишларига аралашувни текширадиган комиссия тузилди

Россия Давлат думаси хориж давлатларининг мамлакат ички ишига аралашувини текшириш бўйича комиссия тузди. Бу ҳақда Россия парламенти қуйи палатасининг сайтида маълум қилинди.

Тегишли қарор лойиҳасида таъкидланишича, тузиладиган комиссиянинг асосий вазифаси бошқа давлатларнинг Россия ички ишларига аралашувини ўрганиш ва фактларни таҳлил қилиш, бу каби аралашув ва ташаббусларга қарши туриш учун қонунчилик чоралари қабул қилиниши бўйича таклифлар тайёрлаш ҳамда хориж давлатлари парламентлари, халқаро жамоатчилик ташкилотлари ва оммавий ахборот воситаларини хабардор қилишдан иборат бўлади.

Аниқлик киритилишича, мазкур комиссия Россия Давлат думасининг амалдаги чақируви ваколатларидан ошмайдиган муддатда фаолият кўрсатади. Комиссия раиси этиб Хавфсизлик ва коррупцияга қарши курашиш қўмитаси раҳбари Василий Пискарёв сайланган. Бундай комиссия олдин Давлат думасининг VII чақириғи вақтида бўлган.

Аввалроқ Хавфсизлик ва коррупцияга қарши курашиш қўмитаси раҳбарининг ўринбосари Андрей Луговой парламент қуйи палатасига хорижий агентлар бўйича ягона қонунни ишлаб чиқиш таклифини билдиришини маълум қилганди.