«Реал» ёзда қатор футболчиларини сотиб юбормоқчи

Мадриднинг «Реал» клуби 2020/22 йилги мавсум якунида таркибда ўзгаришлар амалга оширмоқчи.

Marca нашрининг хабарига кўра, президент Флорентино Перес клуб бош директори Хосе Санчес билан жамоа келажагини муҳокама қилган. Учрашувда ярим ҳимоячилар Эден Азар, Дани Себальос, ҳужумчилар Мариано Диас, Лука Йович, шунингдек, ҳимоячи Хесус Вальехони сотиш қарори муҳокама қилинган.

Ушбу футболчиларнинг сотувидан сўнг, «Реал»нинг трансфер бозоридаги фаоллиги ошиши кутилмоқда. Агарда маблағ йиғилса, ёзги трансфер бозорида мадридликлар «Монако» таянч ярим ҳимоячиси Орелян Тчуаменини харид қилишни мақсад қилган.

Аввалроқ «Реал» Эрлинг Ҳоланд билан дастлабки келишувга эришгани, бу келишувдан кейин Ҳоланднинг вакиллари бошқа клублар билан музокара олиб боролмаслиги хабар қилинганди. Шунингдек, мадридликларнинг ёздаги асосий мақсади Килиан Мбаппе билан шартнома имзолаш экани бир неча бор айтилганди.

«Қаймоқранглилар» 2021/22 йилги мавсум Ла Лигада 66 очко жамғарган ҳолда пешқадам бўлиб турибди.