Тошкентнинг майдони 65 гектар бўлган алоҳида экотизими — Ботаника боғидан фоторепортаж

Тошкентнинг жануби-шарқий қисмида жойлашган Ботаника боғи майдони 65 гектар бўлган алоҳида экотизим ҳисобланади. У тирик ўсимликлар тўпламига (генофонд) эга ва мамлакатдаги энг ноёб объект сифатида баҳоланади.

Ботаника боғида ҳозирги кунда 43 гектар дендрарий, 5 гектар манзарали питомниклар, 1 гектар тропик ва субтропик ўсимликларнинг оранжереяси, шунингдек, иссиқхона ва 16 гектар иҳотазор дарахтлар мавжуд. Дендрарий ўсимлик дунёсини табиий минтақаларга бўлиб ўрганишга асосланган ҳолда ташкил қилинган (Энглер тизими бўйича).

«Дарё» фотомухбири боғ ҳудудидан фоторепортаж тайёрлади.

Ботаника боғида 10 километрдан ортиқ асосий йўлаклар мавжуд. Қишки боғ (оранжерея) лаборатория биноси билан биргаликда 6 та блокдан ташкил топган 1200 метр квадрат майдонни ўз ичига олган. Ботаника боғи иссиқхонаси қишда ҳам тропик ва субтропик ўсимликлар коллекцияси билан ўз яшиллиги ва кўркамлигини сақлаб туради.

Ҳозирги кунда Ботаника боғида 3 та илмий лаборатория мавжуд бўлиб, уларда 20 та илмий ходим ишлайди. Сўнгги 3 йил ичида 1 та докторлик ва 4 та номзодлик диссертациялари ҳимоя қилинди ва ушбу тадқиқотчилар тадқиқот ишларини самарали давом эттирмоқда.

Ботаника боғи фаолияти, уни ривожлантиришнинг устувор йўналишлари Фанлар академияси раҳбарияти ва Инновацион ривожланиш вазирлиги томонидан тизимли равишда амалга ошириб келинмоқда.