2 март куни Украинадан Польша орқали эвакуация қилинаётган фуқароларни олиб келиш учун яна иккита рейс амалга оширилади. Бу ҳақда Uzbekistan Airports хабар берди.
Украинадан эвакуация қилинаётган ўзбекистонликларнинг дастлабки гуруҳи 28 февраль куни, икки гуруҳи эса 1 март куни Тошкентга етиб келди. Ўзбекистоннинг Польшадаги элчиси Баҳром Бобоевнинг сўзларига кўра, Украина ҳудудида бўлган 1,5 минг нафардан зиёд Ўзбекистон фуқароси Польша орқали эвакуация қилиниши режалаштирилган.
Ўзбекистон Транспорт вазирлигининг маълум қилишича, Украинадан Польша ҳудуди орқали ватанга эвакуация қилинган фуқаролардан авиачипталар учун пул ундирилмайди. Шунингдек, Польшанинг Катовице шаҳрига 1 март куни маҳаллий вақт билан соат 09:00 да фуқароларни олиб кетиш учун Uzbekistan Airways авиакомпаниясининг учинчи самолёти келиб қўнган.
Дастлабки маълумотларга кўра, 2 март куни Тошкентга маҳаллий вақт билан соат 04:30 ва 06:30 да яна иккита репатриацион рейс етиб келади.
Изоҳ (0)