2022 йилда Тошкент шаҳридаги кўчаларни тартибга келтириш (таъмирлаш) режасига мувофиқ, 14 февраль куни Алишер Навоий кўчасида таъмирлаш ишлари бошланганди. «Дарё» мухбирининг хабар беришича, таъмирлаш ишлари олиб борилаётган шоҳкўчанинг Абай кўчаси билан кесишмасидаги йўлда трамвай йўли рельслари чиқиб келган.
Афтидан, рельслар тўлиқ олиб ташланмасдан, йўлни асфальтлаш давомида шунчаки кўмиб ташланган.
Пойтахт ҳокимлиги берган хабарга кўра, шоҳкўча тирбандликларни камайтириш, ҳайдовчилар ҳамда пиёдаларга қулайлик яратиш мақсадида реконструкция қилинади. Бунда Навоий—Лабзак кўчасидан Навоий—Беруний кўчаларигача бўлган оралиқ буткул таъмирланиши режалаштирилган.
Эслатиб ўтамиз, 2016 йилнинг 2 май куни Тошкентда ҳаракатланаётган сўнгги трамвай йўналиши — «Бешқайрағоч» даҳаси ва Отчопар ўртасида қатновчи 17-йўналиш ёпилган ва шу тариқа Тошкент трамвайининг 115 йиллик тарихига нуқта қўйилганди.
2022 йилнинг январь охирларида тележурналист Хайрулла Нуриддинов «Ўзбекистон 24» телеканалида эфирга узатилган «Менимча» кўрсатувида Тошкентга трамвай қатновини қайтариш тарафдори эканини айтиб ўтган эди.
«Шаҳар транспорти мавзуси очилганлигидан фойдаланиб, яна бир таклифни айтмоқчиман. Аҳолига қулай ва сифатли транспорт хизматини кўрсатиш соҳасини такомиллаштириш мақсадида Тошкентга трамвайларни қайтариш керак, менимча. Катта ва гавжум шаҳарга трамвай жуда асқатади. Ҳаммамизнинг эсимизда-ку, ўша қулай, бежирим, бир текисда юрадиган, муҳими, экологияга зарар етказмайдиган қадрдон трамвайларимиз. Билмадим, балки хато қилаётгандирман, лекин бу менинг шахсий фикрим. Агар пойтахт мутасаддиларининг ўрнида бўлганимда, ана шу ташаббус билан чиққан бўлардим», — деганди Хайрулла Нуриддинов.
Шавкат Мирзиёев 10 февраль куни Самарқанд вилоятига ташрифида «Трамвайни Тошкентга ҳам қайтармоқчимиз. Фуқаролардан бу борада кўплаб хатлар ва мурожаатлар келяпти», — деб қайд этганди.
Изоҳ (0)