Миллий кураш бўйича Самарқандда бўлиб ўтган Ўзбекистон чемпионатида полвонлардан бири ҳакамга мушт туширди. Бу ҳақда хабар берган «Дарё» манбаси мазкур воқеадан сўнг чемпионат мухлисларсиз ўтганини айтмоқда.
Маълум қилинишича, 2022 йилнинг 26—28 февраль кунлари Самарқанд шаҳридаги яккакурашларга ихтисослаштирилган болалар ва ўсмирлар спорт мактабида кураш бўйича эркаклар ва аёллар ўртасида Ўзбекистон чемпионати бўлиб ўтган.«Полвонлардан бири ҳакамнинг қарорига чидолмади, шекилли, ҳакамга мушт туширди. Бу пайтда бошқа бир ҳакам эса мушт туширган полвонга ташланди. Ўртада тўполон келиб чиқди», — дейди «Дарё» манбаси.
Манбанинг қўшимча қилишича, шу воқеадан сўнг чемпионат мухлисларсиз ўтказилган.
«Миллий курашни жаҳон ареналарига олиб чиқишни ният қиляпмиз. Аммо Ўзбекистонда бўлаётган чемпионатни мухлисларсиз ўтказсак, бу қанчалик адолатдан бўлади? Кураш ва баҳслар мухлислар билан қизиқ-ку», — дейди «Дарё» мухбири билан суҳбатлашган манба.
Ўзбекистон кураш федерациясининг 2022 йил 23 февралдаги эълонида «2022 йилнинг 26—28 февраль кунлари Самарқанд шаҳрида кураш бўйича эркаклар ва аёллар ўртасида Ўзбекистон чемпионати бўлиб ўтиши кераклиги ҳақида айтилган. Чемпионатнинг биринчи кунида гиламга 60, 66 кг вазн тоифасидаги эркаклар ҳамда 48, 52 вазндаги қизлар чиқиши, иккинчи кундаги баҳсларда эса 73, 81, 90 кг вазндаги эркаклар ва 57, 63, 70 вазндаги қизлар беллашиши ҳақида хабар берилган. Шунингдек, чемпионатнинг учинчи кунида эса энг оғир вазндаги (100,+100 кг) эркаклар ва 78, 87, +87 вазндаги аёллар ўзаро беллашиши таъкидланган.
Мавзуга доир:
- «Металлург» клуби бошлиғи «Машъал»га қарши ўйиндан кейин рақиб бош мураббийи Александр Хомяковга мушт туширди (видео)
- Тошкентда такси ҳайдовчиси йўловчи қизнинг юзига мушт туширди. Ҳолат бўйича ИИББ маълумот берди
- Чилонзордаги кафеда жанжал кўтариб, ички ишлар ходимига қўл кўтарган шахслар ҳибсга олинди
Изоҳ (0)