Айрим ижтимоий тармоқларда Украинадан эвакуация қилинаётган Ўзбекистон фуқароларини мамлакатга олиб келиш учун ташкил этилаётган махсус авиарейслар учун чипталар сотилаётгани тўғрисида маълумотлар тарқалмоқда. Ўзбекистон Транспорт вазирлиги мазкур ҳолатга муносабат билдирди.
Маълум қилинишича, махсус авиарейслар Ўзбекистон ҳукумати томонидан бепул ташкил этилмоқда.
Ҳозирда Польшанинг Катовице шаҳридан Uzbekistan Airways томонидан бажарилаётган махсус авиақатновлар орқали Ўзбекистонга олиб келинаётган фуқаролардан авиачипта учун ҳеч қандай тўлов ундирилмайди.
Украинадаги Ўзбекистон фуқароларини эвакуация қилиш ҳамда махсус авиарейслар орқали мамлакатга жўнатиш ишлари Ташқи ишлар вазирлиги томонидан мувофиқлаштирилмоқда.
Украинадан Польшага эвакуация қилинган Ўзбекистон фуқароларини олиб учган Uzbekistan Airways авиакомпанияси самолёти 28 февраль соат 22:49 да «Тошкент» халқаро аэропортига келиб қўнди.
Ушбу махсус рейс билан 251 нафар Ўзбекистон фуқароси Польшанинг Катовице шаҳридан олиб келинган. Олиб келинганларнинг 37 нафари болалар ва 10 нафари — чақалоқ.
1 март куни соат 09:15 да Украинадан Польшага эвакуация қилинган Ўзбекистон фуқароларини олиб учган Uzbekistan Airways авиакомпаниясининг навбатдаги самолёти «Тошкент» халқаро аэропортига етиб келган.
Эслатиб ўтамиз, Украинадан эвакуация қилинаётган ўзбекистонликларнинг дастлабки гуруҳи 28 февраль куни, икки гуруҳи эса 1 март куни Тошкентга етиб келди. Ўзбекистоннинг Польшадаги элчиси Баҳром Бобоевнинг сўзларига кўра, Украина ҳудудида бўлган 1,5 минг нафардан зиёд Ўзбекистон фуқароси Польша орқали эвакуация қилиниши режалаштирилган.
Изоҳ (0)