Сирдарё вилоятида иккита шер боласини ноқонуний олиб кетаётган икки фуқаро ушлангани, улар олиб қўйилиб, вақтинча сақлаш учун белгиланган жойга жойлаштирилгани ҳақида хабар берилган эди. «Ekolog.uz» Telegram-каналининг ёзишича, шерларнинг эгаси улар ноқонуний олиб қўйилган деб ҳисобламоқда ва қайтариб беришларини сўраб Давлат Экология қўмитаси раиси Назрулло Обломуродовга ариза ёзган.
Аризада айтилишича, Тошкентда яшовчи фуқаро Б.Л. шерларни сақлаш учун тегишли гувоҳномага эга. У Сирдарё вилоятига шериклари билан навбатдаги иш фаолияти билан борганида иккита шер боласига тегишли ҳужжатларни кўрсатганига қарамай, божхона ходимлари томонидан олиб борилган рейд доирасида шерлар ундан куч ишлатиб олиб қўйилган.
«Ekolog.uz» Telegram-каналида келтирилган маълумотга кўра, Б.Л. га ҳақиқатан ҳам 2021 йил 14 январда Давлат экология қўмитасининг «Ёввойи ҳайвонларни сақлаш ва урчитиш бўйича питомникларнинг, шунингдек, зоология коллекцияларининг ҳисобига қўйилганлиги тўғрисида» ги гувоҳномаси берилган.
Бироқ Сирдарё вилоят Экология ва атроф-муҳитни муҳофаза қилиш бошқармаси рейд тадбири давомида шер болалари фуқаро Б.Л.дан уларнинг ҳеч қандай ҳужжатлари мавжудмаслиги, уларнинг паспортлари, эмланганлик тўғрисидаги маълумотлари тақдим қилинмагани ҳамда белгиланган тартибда шер болалари қафасларда бўлмагани учун олиб қўйилганини маълум қилган.
Миллий гвардия хабарида келтирилишича, рейд М-34 йўлининг Сирдарё туманидан ўтувчи қисмида божхона, ДХХ ва Экология ва атроф-муҳитни муҳофаза қилиш бошқармалари ходимлари ҳамкорлигида ўтказилган.
Тадбир давомида 24 ёшли фуқаро Х.Б. ўзига тегишли Nexia-3 да 2 дона шер боласини 6500 долларга сотиш учун олдиндан келишилган жойга олиб кетаётган вақтда тадбир иштирокчилари томонидан ашёвий далиллар билан қўлга олинган.
Ҳозирда шер болалари белгиланган тартибда Тошкент вилояти ҳайвонот қўриқхонасига топширилган, ҳолат юзасидан тергов олди суриштирув ишлари Сирдарё вилояти божхона бошқармаси томонидан олиб борилмоқда.
Изоҳ (0)