Украина Россия устидан даъво аризаси билан Гаагадаги Бирлашган Миллатлар Ташкилотининг Халқаро судига шикоят қилди. Бу ҳақда Украина президенти Владимир Зеленский Twitter’да ёзди.
«Украина Гаагадаги БМТ Халқаро судига Россияга қарши даъво аризасини расман юборди. Биз Россиянинг ўз тажовузини оқлаш мақсадида геноцид тушунчасини бузиб кўрсатгани учун жавобгарликка тортилишини талаб қиламиз»— дейилади баёнотда. Унга кўра, Киев суддан Россияга Украинадаги махсус операцияни тўхтатиш бўйича зудлик билан буйруқ беришни ҳамда келаётган ҳафтаданоқ суд мажлисларини бошлашни сўрамоқда.
Халқаро Суд Бирлашган Миллатлар Ташкилотининг асосий суд органи ҳисобланади. У Гаагадаги (Нидерландия) Тинчлик саройида жойлашган бўлиб, 1946 йилдан бери фаолият юритади ва халқаро ҳуқуқ нормаларига мувофиқ давлатлар ўртасидаги ҳуқуқий низоларни ҳал қилади.
Низоларни кўриб чиқишда суд очиқ суд мажлисларини ўтказади, унда тарафларнинг вакиллари ва адвокатлари сўзга чиқади, сўнгра ишни ёпиқ мажлисларда муҳокама қилади ва қарорини эълон қилади. Ушбу қарор якуний ҳисобланади ва шикоят қилиниши мумкин эмас. Агар жараёнда иштирок этувчи давлатлардан бири унга риоя қилмаса, иккинчи томон БМТ Хавфсизлик Кенгашига мурожаат қилиши мумкин.
2017 йилда Украина Халқаро судга Россиянинг Донбассдаги хатти-ҳаракатларини Терроризмни молиялаштиришга қарши кураш бўйича халқаро конвенцияни, Қримдаги ҳаркатларини эса ирқий камситишнинг барча шаклларига барҳам бериш тўғрисидаги халқаро конвенцияни бузиш дея тан олишни талаб қилиб даъво аризаси билан чиққан эди. Ҳозирча бу иш бўйича якуний қарор қабул қилинмаган.
Россия—Украина урушига оид тезкор, ишончли янгиликлар ва маълумотларни «Дарё»нинг Live саҳифаси орқали кузатиб боринг → @Daryo_Live
Изоҳ (0)