Украинадаги воқеалар Марказий Осиё давлатларига қандай иқтисодий оқибатлар олиб келиши мумкин?

Россияга қўлланилган санкциялар Марказий Осиё давлатларига ҳам жиддий таъсир қилади. Бу ҳақда Eurasianet нашри хабар бермоқда.

Қозоғистонда биргина шу ҳафта Россиянинг Украинага ҳужум қилиши ҳақидаги хабарлар бошланганидан сўнг бир неча соат ўтгач, миллий валюта – тенге долларга нисбатан 13 фоизга тушиб кетди. 24 февраль куни Миллий банк ўзининг асосий фоиз ставкасини 10,25 фоиздан 13,5 фоизга оширди. Регуляторнинг таъкидлашича, бу ҳаракат нарх барқарорлигини сақлаб қолиш зарурати билан геосиёсий вазият туфайли амалга оширлиган.

Қирғизистон сўми ҳам худди шундай динамикани бошдан кечирди ва 84 доллардан 95 долларгача тушиб кетди. Қирғизистон Молия вазирлиги тезда банкларга доллар сотиш ва муомалага чиқаришни тақиқлаб, кўплаб валюта айирбошлаш шохобчаларини ёпилишга мажбур қилди.

Россия ҳужуми содир бўлган куни Ўзбекистон валютаси ўзини тутиб турди, бироқ иқтисодий экспертлар келгусида беқарор давр келишидан огоҳлантирмоқда.

Албатта, Россия иқтисодиёти ва Россия рубли Кремлнинг ҳаракатларидан қаттиқ зарба олади. Бу Ўзбекистон иқтисодиётига таъсир қилмай қолмайди. Россия рублининг қулаши Россиядаги меҳнат муҳожирларининг доллар ҳисобидаги даромадлари пасайишини англатади. Шунингдек, Россиядан Ўзбекистонга йўналтирилаётган кредит ва инвестициялар ҳажми ҳам қисқаради, — деди иқтисодчи Юлий Юсупов Eurasianet нашрига.

Бу инқирознинг иқтисодий оқибатлари Тожикистонда айниқса кескин сезилади. Мамлакат иқтисодиётининг қарийб учдан бир қисми меҳнат муҳожирлари томонидан юборилган пул ўтказмаларига таянади. Охирги ҳафтада тожик сомони рублга нисбатан 15 фоизга арзонлашди.

Аввалроқ евронинг қиймати 101 рублга, долларники эса 90 рублга яқинлашгани ҳақида хабар берилган эди.