Тошкентда номаълум шахс кўп қаватли уй зинапоясида 73 ёшли аёлни қўрқитиб, сумкасини тортиб олди

Тошкент шаҳри Яшнобод туманида 17 февраль куни талончилик жиноятини содир этган йигит қўлга олинди. Бу ҳақда Тергов департаменти хабар қилди.

Қайд этилишича, шу куни соат 12:30 ларда номаълум шахс ўзганинг мулкини очиқдан очиқ талон-торож қилиш мақсадида Яшнобод тумани Авиасозлар 1-даҳасида жойлашган кўп қаватли уйнинг иккинчи қават зинапояси йўлагида туриб олган. У зинапоядан ўзининг хонадонига кириш учун кўтарилаётган 73 ёшли V.П.ни тўхтатган. Уни куч ишлатиш билан қўрқитиб, қўлидаги сумкасини талончилик йўли билан тортиб олиб, ҳодиса жойидан яширинган.

Олиб борилган тергов-тезкор ҳаракатлари натижасида, мазкур жиноятни Тошкент вилоятида яшовчи 18 ёшли К.Ш. содир этгани аниқланган.

Ҳолат юзасидан К.Ш.га нисбатан Жиноят кодекснинг 166-моддаси 2-қисми «а» банди (талончилик) билан жиноят иши қўзғатилган.

Ҳозирда юқоридаги шахс нима сабабдан талончиликка қўл ургани аниқланмоқда.