Тошкент метрополитенида 23 февралдан бошлаб илк маротаба она ва бола хонаси ҳамда ҳожатхонадан фойдаланиш бошланади. Бу ҳақда метрополитен матбуот хизмати раҳбари Миракбар Толипов «Дарё»га маълум қилди.
Қайд этилишича, ташаббус президентнинг «Тошкент метрополитени фаолиятининг самарадорлигини ошириш чора-тадбирлари тўғрисида»га қарори ижросини таъминлаш мақсадида жорий этилган.
«Ушбу хона замон талабларига мос равишда барпо этилган бўлиб, қатор қулай ускуналар билан жиҳозланган», — дейилади хабарда.
Эслатиб ўтамиз, «Дарё»да Тошкент метрополитенида содир бўлаётган носозликлар, кўрсатилаётган хизматлар сифати, қулайлик ва камчиликлар тўғрисидаги «Кассаларда навбат, тиббий ёрдам ололмайсан, бекатларни номи эмас, ўриндиқларига қараб ажратасан. Тошкент метросига нималар етишмаяпти?» сарлавҳали мақола эълон қилинганди. Тошкент метрополитени мақолага муносабат билдирган. Унда «Чилонзор» метро бекатида тажриба тариқасида ҳожатхона қуриш ишлари олиб борилаётгани, агарда бу ўзини оқласа, бошқа бекатларда ҳам амалда татбиқ этилиши айтилганди.
Изоҳ (0)