Ижтимоий тармоқларда бош вазирнинг биринчи ўринбосари Очилбой Раматовнинг аёли Раъно Раматова Швейцариянинг Credit Suisse банкида ҳисоб рақамига эгалик қилиши, унда миллион доллардан зиёд пул маблағи сақланиши ҳақида хабарлар тарқалди. «Дарё» мухбири ҳолатга аниқлик киритиш мақсадида Раъно Раматованинг ўзи билан боғланди.
«Дарё» мухбири унга 2010—2015 йилларда Швейцария банкида унга тегишли ҳисоб рақам бўлгани ҳақида интернетда тарқалган хабарларга изоҳ беришни сўраб мурожаат қилган. Унинг айтишича, бу ахборот ёлғон бўлиб, ҳақиқатга мутлақо тўғри келмайди. Қолаверса, хорижий банкларнинг ҳеч бирида у ёки унинг оила аъзоларига тегишли ҳисоб рақам мавжуд эмас ва илгари ҳам бўлмаган. Раматова ОАВдан фейк маълумотларни тарқатмасликни сўраган.
Бундан илгарироқ Қозоғистон президенти Қосим-Жўмарт Тўқаев ва тадбиркор Алишер Усмоновнинг матбуот хизматлари ҳам Credit Suisse банкида уларга тегишли ҳисоб рақамлар мавжудлиги борасида раддия эълон қилган эди.
Бундан ташқари, Credit Suisse банки бўйича материалларни эълон қилган Коррупция ва уюшган жиноятчилик бўйича тадқиқотлар маркази уларни аноним манбадан олганини маълум қилган. Айни пайтда банкнинг ўзи гўёки йўл қўйилган ноқонуний бизнес амалиётлар ҳақидаги гумон ва фаразларни қатъий инкор қилган.
Эслатиб ўтамиз, бир неча кун олдин Коррупция ва уюшган жиноятчиликка оид тадқиқотлар маркази (ООCРП) ҳамда 39 та мамлакатдан, жами 48 та оммавий ахборот воситасида фаолият олиб борувчи журналистлар #SuisseSecrets («Credit Suisse сирлари») суриштирувини эълон қилди. Credit Suisse банкида Ўзбекистондаги машҳур шифокорлардан бири, акушер-гинеколог Саодат Нарзиеванинг исми-шарифи ҳам келтирилган эди. Унинг ҳисоб рақамидаги маблағлар 1 миллиард 855 миллион Швейцария франки (2 миллиард 22 миллион доллар)га етгани қайд этилган.
Изоҳ (0)