Ўзбекистонда 2022 йилнинг январь ойида енгил автомобиль ишлаб чиқариш ўтган йилнинг шу даврига нисбатан икки баробарга ошди. Бу ҳақда Давлат статистика қўмитаси ҳисоботида қайд этилди.
Январь ойида энг кўп ишлаб чиқарилган автомобиль Lacetti-Gentra бўлди — 4216 дона. 2021 йилнинг худди шу ойида бу турдаги икки дона автомобиль ишлаб чиқарилган эди, ундан олдинги йилда эса 5962 тани ташкил қилган.
Cobalt автомобиллари бу йилнинг бошида 3393 дона ишлаб чиқарилган. Ўтган йилда 101 дона бу турдаги автомобиль ишлаб чиқарилган бўлса, 2020 йилда 5078 та эди.
2022 йилнинг январь ойида 323 дона Spark автомобили ишлаб чиқарилган. Бу ўтган йилнинг шу даврига нисбатан 284 тага кўп.
Шундай қилиб, UzAuto Motors ўтган йилни инқироз билан бошлаган бўлса, бу йилги кўрсаткичлар 2020 йилгисига деярли яқинлашиб қолди.
2021 йилда ишлаб чиқариш пасайишининг асосий сабаби сифатида бутун жаҳонда бир неча йиллардан бери юз бераётган микросхемалар танқислиги кўрсатилмоқда.
Чиплар таъминотидаги узилишлар сабаб бир қатор автокорхоналар фаолияти тўхтатилиб, натижада микропроцессорлар хариди 2020 йилнинг бошидаёқ максимал даражада қисқарган эди.
Етишмовчилик туфайли яримўтказгичларни сотиб олишда сезиларли даражадаги қатор навбатлар юзага келди. Ушбу навбатлар охирида GM, Форд, Fiat Chrysler, Volkswagen, Renault, Subaru, Nissan, Honda ва Mazda автомобиль ишлаб чиқарувчи корхоналар турарди.
Кўплаб йирик автокорхоналар миллиардлаб долларлик зиён кўрди. GM компанияси Америкадаги иккита фабрикасини ёпишга ҳам улгурди, Кореядаги ишлаб чиқариш ҳажмини қисқартирди ва натижада тахмин қилинаётган даромад ҳажмини пасайтирди.
Апрель ойида Nvidia корпорациясининг молиявий директори Колетт Кресс микросхемалар етишмовчилиги йил охиригача кузатилишини прогноз қилганди.
Аввалроқ автотранспорт воситаларини давлат рўйхатидан ўтказишда ҳам жадал ўсиш кузатилаётгани ҳақида хабар берилган эди.
Унга кўра 2022 йил январь ойида 113,2 минг дона автомобиль давлат рўйхатидан ўтказилди.
Бу кўрсаткич ўтган йилнинг январига нисбатан 126,4 фоизга, 2020 йил январь ойига нисбатан эса 138,4 фоизга кўп. 2021 йилнинг декабрига нисбатан ўсиш суръати 96,5 фоизни ташкил этди.
Изоҳ (0)