НАТО Киевдаги офисини ёпди. Европанинг бир қатор авиакомпаниялари Украинага парвозларни тўхтатди

НАТО Украинадаги ходимларини пойтахт Киевдан Львов шаҳрига кўчиришга қарор қилди, ходимларнинг бир қисми Брюсселга кўчиб ўтади. Бу ҳақда альянс матбуот хизматига таяниб, Норвегиянинг VG телеканали хабар берди.

Альянс ва иттифоқчи давлатлар Украинадаги вазиятни кузатмоқда ва зарурий эҳтиёт чораларини кўрмоқда, дея хабар беради блокнинг матбуот хизмати.

«Ходимларимиз хавфсизлиги биринчи ўринда туради, шунинг учун улар Львов ва Брюсселга кўчирилди. Шу тариқа НАТОнинг Украинадаги ваколатхоналари ишлашда давом этмоқда», — дея қўшимча қилинган хабарда.

Февраль ойи ўрталарида АҚШ Украинадаги элчихонасини вақтинча Киевдан Львовга кўчирганди. Давлат котиби Энтони Блинкеннинг сўзларига кўра, бундай чора «Россия кучларининг Украина билан чегарада сезиларли даражада тўпланиши» фонида дипломатик миссия «ходимларининг хавфсизлиги учун» қабул қилинган. АҚШ ортидан Буюк Британия Украинадаги элчихонасини Лвовга кўчиришга қарор қилган. Австралия ва Канада ҳам худди шундай чоралар кўрган.

Бу орада Германиянинг Lufthansa авиакомпанияси 21—28 февраль кунлари Киевга парвозларни тўхтатишини эълон қилди. Авиакомпания Одессага ҳам парвозларни амалга оширмайди. Lufthansa вазиятни доимий равишда кузатиб боришини ва кейинги парвозлар ҳақида ҳали яна қарор қабул қилишини билдирган.

Бир вақтнинг ўзида, Австриянинг Аустриан Airlines авиакомпанияси ҳам Киев ва Одессага парвозларни 20 февралдан ой охиригача тўхтатишини маълум қилди.

19 февраль куни Германия ва Австрия ҳукумати ўз фуқароларини эҳтимолий Россия босқини туфайли Украинани тарк этишга чақирганди. Февраль ойи бошида Нидерландиянинг КЛМ авиакомпанияси худди шундай сабаб билан Украинага парвозларни тўхтатган эди.