Комил Алламжонов Тошкент ҳокими лавозимига тайёрланаётгани ҳақидаги миш-мишлар рад этилди

Ижтимоий тармоқларда Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси Комил Алламжонов Тошкент шаҳар ҳокими вазифасини бажаришга тайёрланаётгани тўғрисида хабарлар тарқалди. Фонд матбуот котиби Ҳикматилла Убайдуллаев мазкур миш-мишлар асоссиз эканини маълум қилди.

Аввалроқ Жаҳонгир Ортиқхўжаев 3,5 йилдан буён ҳокимиятда ишлаб, давлатнинг бир сўмига ҳам хиёнят қилмаганини билдирганди. Кейинроқ ҳокимнинг қизи отасининг фаолиятини салбий баҳолаётган ОАВ ходимларини танқид қилди. Комил Алламжонов эса журналист ва блогерларни душман деб билиб, уларни ёмон кўрган амалдорнинг косаси ҳеч қачон оқармаслигини, «уларга уруш эълон қилинса, токи ўша амалдор жойидан кетмагунича ҳеч қачон тугамаслигини» ёзган.