18 февралдан бошлаб Тошкент шаҳар ИИББ ЖХХ ЙҲХБнинг иккита рўйхатдан ўтказиш ва имтиҳон олиш бўлимида ҳайдовчилик гувоҳномаларини янги намунасига алмаштириш фаолияти йўлга қўйилди. Бу ҳақда ИИВ ЙҲХББ ахборот хизмати хабар берди.
Маълум қилинишича, Тошкент ҳалқа автомобиль йўлида жойлашган Юнусобод ҳамда Бунёдкор шоҳкўчасида жойлашган Чилонзор туманлараро рўйхатдан ўтказиш ва имтиҳон олиш бўлинмаларида фуқароларга қулайлик яратиш мақсадида эски намунадаги ҳайдовчилик гувоҳномаларини янги намунасига алмаштириш фаолияти йўлга қўйилган.
Ҳукумат қарорига 2021 йилнинг 17 ноябрь куни киритилган ўзгартиришларга кўра, Ўзбекистонда эски ҳайдовчилик гувоҳномасини алмаштириш муддати 1 йилга узайтирилган. Бунда эски ҳайдовчилик гувоҳномасини янги намунадагисига алмаштириш 2022 йил 31 декабрга қадар давом этади ва қайта имтиҳон варақаси талаб этилмайди.
Эслатиб ўтамиз, 3 февраль куни Тошкентда ҳайдовчилик гувоҳномасини олиш учун имтиҳон топшириш бўйича Тошкент имтиҳон маркази иш бошлади. Ички ишлар вазири ўринбосари, жамоат хавфсизлиги департаменти бошлиғи Бекмурод Абдуллаев фақат етарли билим ва малакага эга ҳайдовчиларга гувоҳнома берилишни бошлагач, йўлларда ҳайдовчилик маданияти ошади, йўл-транспорт ҳодисалари камайишини айтиб ўтди.
Изоҳ (0)