Пеп Гвардиола «Манчестер Сити»даги келажаги ҳақида: «Хавотир олманг, мен Алекс Фергюсон бўлмайман»

«Манчестер Сити» бош мураббийи Пеп Гвардиола келажаги борасидаги саволларга жавоб берди.

«Манчестер Сити»да 10–15 йил қоламанми? Хавотир олманг, мен сер Алекс Фергюсон бўлмайман. Бир ярим йил — футболда катта муддат. Ҳамжиҳатлигимиз эса бунга ёрдам беради: охирги 20 ўйиннинг 18 тасида ғалаба қозондик, фақатгина «Лейпциг»га қарши муҳим бўлмаган ўйинда мағлуб бўлдик.

Футболчилар кам ўйин амалиётига эга бўлаётганидан хафа бўлишини биламан. Қолган нарсалардан эса шикоят қилиб бўлмайди — физиотерапевтлар, спорт фанлари, ҳамма ёрдам беришга тайёр. Шунинг учун уларда шикоят қилишга сабаб йўқ.

Ғалаба ёки мағлубиятда тасодиф элементи мавжуд, нима бўлишини олдиндан билолмайсиз. Биз ғалаба қозониш ва табассум қилиш учун биргамиз. Ғамгин юз билан юқори даражага чиқишнинг иложи йўқ. Қолган нарсалар унчалик муҳим эмас.

Нима бўлишини олдиндан билиш учун ишлаймиз, аммо ҳеч ким ўйин вақтида нима бўлишини билмайди. Энг яхши натижани кўрсатиш учун шуғулланамиз. Ҳимоя чизиғини бурчак тўпларига қарши тайёрлашингиз, айнан ўша нуқтадан тўп ўтказиб юбормаслигингизни таъминламайди. Яхшисига ҳаракат қилиш ва афсусланмаслик лозим.

Хосеп Гвардиола, «Манчестер Сити» бош мураббийи

«Шаҳарликлар» 2021/22 йилги мавсумда 63 очко билан АПЛ етакчиси бўлиб турибди. Ундан кейинги ўринда бораётган «Ливерпуль» 9 очко ортда бормоқда.