Бизнесмен, Murad Buildings компанияси асосчиси Мурод Назаров Шоира Мирсодиқовага берган интервьюсида олтин зарраси қўшилган Ocard сув бренди Тошкент шаҳар ҳокими Жаҳонгир Ортиқхўжаевнинг қизига тегишли эканини айтди.
Маълумот учун, Мурод Назаров Ocard сувига олинган реклама ролигида Жеймс Бонд ролини ижро этган.
Шоира Мирсодиқова тадбиркорга «Ocard учун рекламага тушдингиз. Сув ўзингизникими?», дея савол берган. Мурод Назаров саволга жавобан қуйидаги сўзларни келтирган:
«Йўқ-йўқ, сув устозимиз Жаҳонгир Ортиқхўжаевнинг қизлариники. Суратга олиш ишлари қизиқ жараён бўлган.
Кўп жойлардан рекламага таклиф қилишади, қарамайман, биз актёр, реклама агентлиги эмасмиз. Жеймс Бонд ролигини олишдан икки ой олдин бир хорижий, жуда жиддий компаниядан таклиф бўлганди, бир кунлик тасвирга олиш жараёнлари учун 200 минг доллар берамиз, дейишган. Рози бўлмагандим.
Лекин Ocard суви рекламасига биргина телефон қўнғироғида рози бўлганман. Чунки Жаҳонгир акадан ёмон ғоя чиқмайди. Ўшанда устоз кечаси соат 23:30 ларда телефон қилиб қолдилар, тинчликмикан, деб гўшакни кўтарсам, менга қаранг, битта зўр ғоя бор, сизга мўлжаллаб қилинади. Жеймс Бонд бўлгингиз келадими? Парашютдан сакрашни эплайсизми, дедилар. Мен рози бўлдим.
Текинга ўйнаб берганман, ўзимга ёққани учун. Икки кун вақтимиз кетган. Ҳаммаёғим қонаб, кўкариб кетганди. Каскадёрлардан фойдаланмадик, ўзим қилдим ҳаммасини. Бир ҳафта қонаб юрди, актёрларга ҳам осон эмас экан (кулади)».
Изоҳ (0)