Андижон вилоятининг Олтинкўл туманида шаръий никоҳдаги хотинининг собиқ қайнонасини кетмон билан уриб ўлдирган эркакка суд ҳукми ўқилди. Бу ҳақда «Дарё»га Андижон вилояти суди ахборот хизмати маълум қилди.
Аниқланишича, судланувчи М.Р. 2018 йилнинг баҳорида олтинкўллик Э.М. билан танишиб қолиб, унга турмуш ўртоғи вафот этганини, уч нафар фарзанди билан ёлғиз қолганини айтиб, шаръий никоҳ асосида оила қурган.«Биринчи турмушим билан ажрашган бўлсам-да, бир уйда бошқа-бошқа хоналарда яшардик. 2019 йилнинг март ойида Россиядан келганимда собиқ хотиним уйдан чиқиб кетишимни сўради. Шундан кейин шаръий никоҳдаги хотиним билан яшашни бошладим. Аввалига тинч яшадик. Бир девор нарида М. исмли кампир ҳам яшарди. Кейинчалик у турмуш ўртоғимнинг собиқ қайнонаси эканлигини билдим. Аёлим билан бирга яшаш давомида Россия, Қирғизистонга бориб, ишлаб келдик. 2021 йилнинг март ойи бошларида Қирғизистондан қайтганимда хотиним яшаб турган уйимизни номига ололмаётганини, бунга собиқ қайнопалари рози бўлмаганини, оқибатда бир неча маротаба жанжал бўлганини айтди. Йўқлигимда ҳатто туман ҳокими келиб можарони тинч йўл билан ҳал қилиб беришини, бунинг учун қайнона ва келин яшаб турган хонадонлар ўртасидаги девор қурилишини тугаллаб беришини айтган. Шундай бўлса-да, хотинимнинг қайнонаси девор қурилишига қаршилик кўрсатган», — дейди судда сўз олган судланувчи М.Р.
Судланувчининг айтишича, кундалик жанжалларнинг бирида шаръий никоҳдаги хотинининг собиқ қайнонаси уни ҳақорат қилиб, келгинди деган. Унинг ўлдирилишига айнан шу сўзи сабаб бўлган.
«‘Ҳа, келгинди. Энди бу ерга келиб олиб, уйни ўзингники қилиб олмоқчимисан? Бу ерда менинг набираларим бор. Келиним ва болларини олиб, бу ердан кет. Бу уйда бошқа набираларим яшайди’, дея мени доимий қарғайдиган одат чиқариб олди», — дейди судланувчи М.Р.
Суд ҳужжатларида қайд этилишича, М.Р. 2021 йилнинг 14 апрель куни эрталаб бозорга бориб, қурилиш материалларини олиб қайтаётганда, шаръий никоҳдаги хотини Э.М. қўнғироқ қилиб, уйга усталар келганини айтган. Шунда у кўчадан спиртли ичимлик ичиб, уйига қайтган. Уйга қайтгач, аввалига хотини билан, сўнгра девор ураётган усталар билан тортишган. Ҳатто муштлашишгача борган. Бу ҳолатни кўрган хотинининг собиқ қайнонаси уни яна қарғаган. Ўртадаги тортишув уларнинг катта жанжалига айланган. Шунда эркак шу ердаги кетмонни олиб, қайнонанинг бошига, юзига уриб, уни ўлдириб қўйган.
Суд ҳукми билан М.Р. Жиноят кодексининг 97-моддаси 1-қисми (қасддан одам ўлдириш) билан айбдор деб топилиб, 11 йил муддатга озодликдан маҳрум қилинган. Шунингдек, ундан жабрланувчининг вакили фойдасига ўн беш миллион сўм маънавий зарар ундириш белгиланган.
Изоҳ (0)