Uzbekistan Airways биринчи A321LR самолётига эга бўлди

Uzbekistan Airways биринчи A321LR самолётига эга бўлди. Бу ҳақда Airbus матбуот хизмати «Дарё»га хабар берди.

Самолёт икки классли макет асосида қурилган ва 188 нафар йўловчига мўлжалланган. Авиакомпания A321LR ички ва халқаро йўналишларда фойдаланишни режалаштирмоқда.

Компания жами 5 та Airbus самолётларига буюртма берган: яна тўртта авиалайнер 2022 йилнинг охиригача етказиб берилади.

Биз ўз самолётлар паркимизни узоқ масофали A321neo янги версияси ёрдамида модернизациялашда давом этамиз. LEAP двигателлари билан жиҳозланган комфорт-класс самолётларимиз Европа, Америка, Яқин Шарқ, Осиёнинг 22 та шаҳрига ва МДҲнинг 24 шаҳрига рейсларни амалга оширади, шунингдек, 11 та ички йўналиш бўйича фойдаланилади, – дейди Uzbekistan Airways бошқарув раиси Илҳом Маҳкамов.

A321LR – бу катта ҳажмли ёқилғини сақлашга мўлжалланган учта қўшимча марказий бак (АCТ) туфайли 7400 кмгача бўлган масофага учиш имконини берадиган кенгайтирилган диапазонга эга А320neo’нинг версияси. 

Аввалги авлод самолётларига нисбатан моделнинг ёқилғи сарфланиши, CO2 чиқиндилари ва ҳар бир ўриндиқ учун фойдаланиш харажатлари 30 фоизга камайтирилган.