«Ўзбекнефтгаз» АЖ бошқаруви раиси Меҳриддин Абдуллаев топшириғи билан нефть ва газ қазиб чиқарувчи бошқармаларнинг ишлаб чиқариш қувватини тиклаш мақсадида, ускуналарнинг сифатли ва ўз вақтида таъмирланишини йўлга қўйиш борасида қатор чора-тадбирлар белгилаб олинган.
Газли нефть ва газ қазиб чиқариш бошқармасига қарашли «Учқир» сиқув компрессор станцияда аниқланган камчиликларни бартараф этиш ва авариявий тўхталишларнинг олдини олиш мақсадида, таъмирлаш ишларига Германиянинг Siemens Energy, Сингапурнинг Enter Engineering RTE. LTD компаниялари ва акциядорлик жамиятининг бир гуруҳ малакали мутахассислари жалб этилди.
Ушбу сиқув компрессор станциясининг асосий вазифаси «Дояхотин», «Қумли» гуруҳлари ва «Учқир» конлардаги табиий газларни тез ва самарали қазиб олинишдан иборат. Шуни алоҳида таъкидлаб ўтиш жоизки, битта газ ҳайдаш агрегатининг тўхтаб қолиши кунлик 1 миллион куб метрга яқин табиий газ қазиб олиш ҳажмининг қисқаришига олиб келади.
Юқоридагиларни ҳисобга олган ҳолда ҳамда станция кафолат муддатида турганлиги сабабли, аниқланган носозликларни бартараф этиш мақсадида таъмирлаш ишларини тезкор равишда ўтказиш зарурияти пайдо бўлди. Ушбу ишларни амалга ошириш учун Siemens Energy компаниясининг мутахассислар билан биргаликда, станциянинг 200-сонли газ ҳайдаш агрегатига ўрнатилган SGT-400 русумли газ турбинали двигателида таъмирлаш ишлари ишлаб чиқарувчи заводнинг йўриқномасига асосан амалга оширилмоқда.
Таъмирлаш жараёнида газтурбинали двигатель демонтаж қилиниб, Siemens Energy компанияси томонидан етказиб берилган таянч подшипникини янгисига алмаштириш ишлари амалга оширилади.
Шунингдек, бир қанча техник жиҳатдан мураккаб бўлган ҳисоблашлар ҳам ўтказилади. Созлаш ишлари ҳамда газ ҳайдаш агрегатининг автоматика қисмида «Махсусэнергогаз» АЖ мутахассислари ҳамкорлигида автоматик бошқарув тизими, датчик ва приборлари текширилиб, профлактика ишлари олиб борилди. Натижада 200-сонли газ ҳайдаш агрегатининг узлуксиз, бир меъёрда ишлашининг таъминланишига ҳамда табиий газ қазиб олиш ҳажмининг қисқаришини олдини олишга эришилди.
Маълумот учун
«Учқир» сиқув компрессор станцияси Бухоро вилояти, Ромитон туманида жойлашган бўлиб, 2 та газ ҳайдаш агрегатлари мавжуд ва йилига 5,0 миллиард куб метр табиий газни ҳайдаб бериш қувватига эга. Станцияга 2021 йилда Германиянинг Siemens Energy компаниясида ишлаб чиқарилган газ ҳайдаш агрегатлари ўрнатилган ва ишга туширилган.
«Ўзбекнефтгаз» АЖ матбуот хизмати
Изоҳ (0)