Тошкент вилояти ҳокими Зоир Мирзаев вилоятнинг чекка қишлоқларидан бири Пском қишлоғига бориб, тунаб қолишини билдирган. Бу ҳақда вилоят ҳокимлиги ахборот хизмати хабар берди.
Зоир Мирзаев чекка қишлоқда уни қаршилаган аҳоли вакиллари билан суҳбатлашар экан, вилоятнинг барча раҳбарларини шу қишлоққа олиб келганини, аҳоли муаммосини ўрганишни мақсад қилганини билдирган.
«Бугун шу қишлоқда қолайлик ва аҳоли билан суҳбатлашайлик, дедик. Барча муаммоларни биргаликда ўрганамиз. Вилоятнинг барча раҳбарларини олиб келдим. Биласиз, кўпчилик раҳбарлар шаҳарда яшайди. Улар ҳам қишлоқ ҳаётини кўрса, печка, ўтин ва кўмир деган нарсаларни билса, ёнига мурожаат қилиб борган аҳолига бошқача муносабатда бўлади», — дейди аҳоли вакиллари билан суҳбатлашган Зоир Мирзаев.
Зоир Мирзаевнинг ОАВ вакиллари билан суҳбатидан англашилича, сўнгги 20-22 йил давомида Тошкент вилоятида раҳбарлик қилган ҳокимлар орасида Зоир Мирзаев Пском қишлоғига боришга қарор қилган.
«Биз бу қишлоқ муаммосини эшитиб, билиб, шу ерга келяпмиз. Бизга дастлаб йўл масаласини айтишди. Йўл бўйича ҳисоб-китобимиз бор. Шунингдек, шу қишлоқда яшовчи аёллар пишириқ пишириш билан шуғулланар экан. Аммо уларда жой муаммоси бор экан. Балки, шу ерда турган бўш бинони шу аёлларга мослаштириб берармиз деб режалаштиряпмиз. Қолаверса, қўшни қишлоқда тиббиёт маскани йўқ дейишди. Ўрганиб чиқсак, тиббиёт муассасаси эмас, тиббиёт ходими етишмас экан. Хуллас, бугун айнан шу қишлоқ муаммоларини ҳал этишни мақсад қилганмиз», — дейди журналистлар саволига жавоб берган Зоир Мирзаев.Зоир Мирзаев чекка қишлоқларда тунаб қолиб, аҳоли муаммосини ўрганишни Қашқадарё вилоятида раҳбарлик қилаётган пайтидан одат қилган бўлиб, у 2020 йил Қашқадарё вилоятининг энг чекка қишлоғи — Сарчашма қишлоғида бўлиб, аҳоли тўйида меҳмон бўлганди.
Изоҳ (0)