Ўзбекистонда 2021 йилда қанча балиқ овлангани маълум қилинди

Ўзбекистонда 2021 йилнинг январь—декабрь ойлари давомида 173 866 тонна балиқ овланган, деб хабар беради Давлат статистика қўмитаси.

Эълон қилинган маълумотларга кўра, энг кўп балиқ Хоразм вилоятида овланган бўлса (31 минг тоннадан ортиқ), энг ками Сурхондарё вилояти ҳисобига тўғри келган (қарийб 5 минг тонна).

Ҳудудлар кесимида овланган балиқ ҳажми:

• Хоразм вилояти – 31 117 тонна;
• Самарқанд вилояти – 21 982 тонна;
• Андижон вилояти – 17 663 тонна;
• Қорақалпоғистон Республикаси – 14 454 тонна;
• Навоий вилояти – 13 503 тонна;
• Жиззах вилояти – 13 139 тонна;
• Фарғона вилояти – 11 763 тонна;
• Бухоро вилояти – 11 421 тонна;
• Наманган вилояти – 11 187 тонна;
• Тошкент вилояти – 10 222 тонна;
• Қашқадарё вилояти – 6 505 тонна;
• Сирдарё вилояти –5 933 тонна;
• Сурхондарё вилояти – 4 977 тонна.

Эслатиб ўтамиз, январь ўрталарида «Балиқчилик тармоғини янада ривожлантиришнинг қўшимча чора-тадбирлари тўғрисида»ги президент қарори қабул қилинганди. Унга кўра, 2022 йил 1 февралдан 2025 йил 1 январгача балиқчиликни интенсивлаштириш учун зарур бўлган асбоб-ускуналар ва технологиялар (аэратор, бассейн, автокормушка, УЗВ) ҳамда қайта ишлаш ускуналарини ишлаб чиқаришни йўлга қўйган, бироқ даромадининг 80 фоизидан ортиғини ушбу ускуналарни ишлаб чиқаришдан оладиган субъектлар учун фойда солиғи (тижорат банкларида жойлаштирилган маблағлардан олинган фоизлардан ташқари), юридик шахслардан олинадиган ер солиғи, юридик шахсларнинг мол-мулкига солинадиган солиқ ва сув ресурсларидан фойдаланганлик учун солиқ ставкалари 50 фоизга камайтирилади.