Жиззах вилояти Мирзачўл туманида ижтимоий тармоқ орқали танишган аёлни шахсий расмларини интернетда тарқатиш билан қўрқитиб, ундан пул талаб қилган шахс ушланди.
Қайд этилишича, 2022 йил 28 январь куни Т.Ф. (36 ёшли) вилоят ИИБ бошлиғи номига ариза билан мурожаат қилган. Унда 2021 йил июль ойида Facebook ижтимоий тармоғи орқали Туркия фуқароси А.Ч. (38 ёшли) билан танишиб қолгани, шу вақтдан бошлаб у билан яқин муносабатларда бўлиб келиб, А.Ч. унинг сир сақланиши лозим бўлган маълумотларини ўз уяли алоқа воситасига юклаб олганини айтган.
А.Ч. ушбу маълумотларни интернет тармоқларида тарқатиш билан қўрқитиб, агар маълумотлар ошкор бўлмаслигини хоҳласа, унга 10 миллион сўм беришини талаб қилган. Ўз навбатида Т.Ф. ноилож аҳволда қолиб, пул тўплаб, ўзининг укаси орқали А.Ч.га 5 миллион сўм пулларни тақдим қилган.
Терговга қадар текшириш давомида А.Ч.нинг фойдаланувида бўлган Samsung А71 телефон аппарати кўздан кечирилганда, унинг хотирасида фуқаро Т.Ф.нинг 64 дона расми борлиги аниқланиб, ушбу телефон аппарати ашёвий далил тариқасида расмийлаштириб олинган.
Мазкур ҳолат юзасидан Мирзачўл туман ИИБ ҳузуридаги Тергов гуруҳи томонидан Жиноят кодексининг 165-моддаси 1-қисми (товламачилик) билан жиноят иши қўзғатилган.
Ҳозирда дастлабки тергов ҳаракатлари олиб борилмоқда.
Мавзуга доир:
- Андижонда фуқаронинг МИБ ҳисобига ўтказиб юборган ортиқча 7,5 миллион сўмни қайтариш учун 3 млн сўм талаб қилган банк юристи ва МИБ ходими қамоққа олинди
- Қашқадарёда аёлнинг беҳаё видеосини тарқатмаслик учун 900 доллар ва қимматбаҳо буюмлар талаб қилган эркак ушланди
- Наманганда хотини билан гаплашган йигитни ўлдириш билан қўрқитиб, ундан 7 млн сўм талаб қилган эркак ушланди
Изоҳ (0)