Ижтимоий тармоқларда Тошкент вилояти Олмалиқ шаҳридаги кафелардан бирида маст ҳолдаги эркак ва аёллар ўртасида жанжал содир бўлгани акс этган видеолавҳалар тарқалди. Вилоят Ички ишлар бош бошқармаси матбуот котиби Бобур Тўлаганов ҳолат бўйича маълумот берди.
Қайд этилишича, ҳолат 11 февраль куни соат 21:30 да Олмалиқ шаҳар «Бирдамлик» маҳалласида жойлашган «Марҳамат» ресторанида содир бўлган. Хабарга асосан шу вақтда воқеа жойига Олмалиқ ички ишлар бошқармаси тезкор-тергов гуруҳи етиб борган.
Ўрганишлар давомида жанжал иштирокчилари бўлган 2 нафар эркак ва 4 нафар аёл аниқланиб, ИИБга олиб борилган. Тиббий кўрик хулосасида уларнинг маст ҳолда бўлгани аниқланган.
Ҳозирда ҳодиса иштирокчиларига суд-тиббий экспертизасидан ўтиши учун йўлланма берилиб, терговга қадар суриштирув ишлари олиб борилмоқда. Воқеа гувоҳлари ва ресторан масъуллари ишга жалб қилинган.
«Суриштирув натижаси юзасидан қўшимча маълумот берилади», — дейилади хабарда.
Изоҳ (0)