Andijonda fuqaroning MIB hisobiga o‘tkazib yuborgan ortiqcha 7,5 million so‘mni qaytarish uchun 3 mln so‘m talab qilgan bank yuristi va MIB xodimi qamoqqa olindi

Andijonda tadbirkordan MIB hisob raqamiga ortiqcha o‘tkazilgan mablag‘larni qaytarib berish evaziga 3 million so‘m talab qilgan bank yuristi hamda MIB xodimi ushlandi, deb xabar bermoqda “Daryo” muxbiri.

Ma’lum bo‘lishicha, 2022-yilning 28-yanvarida DXX hamda Iqtisodiy jinoyatlarga qarshi kurashish departamentining viloyat boshqarmalari tomonidan o‘tkazilgan tezkor tadbirda “Xalq banki” Shahrixon tuman filiali yuristi M.B. tadbirkor tomonidan MIB hisob raqamiga o‘tkazib yuborilgan ortiqcha 7,5 million so‘m mablag‘ni qaytarib berish evaziga undan tovlamachilik yo‘li bilan 3 million so‘m talab qilib, olayotganda ushlangan.

Aniqlanishicha, M.B. mazkur mablag‘ni MIBning Shahrixon tumani bo‘limi davlat ijrochisi M.J. ko‘rsatmasi bilan olgan va unga eltib berishi kerak bo‘lgan. Tadbir davomida MIB ijrochisi M.J. 3 million so‘mni bank yuristidan olayotgan vaqtda qo‘lga olingan.

Mazkur holat yuzasidan Andijon viloyat prokuraturasi tomonidan Jinoyat kodeksining 25-moddasi (jinoyatga tayyorgarlik ko‘rish va jinoyat sodir etishga suiqasd qilish), 168-moddasi (firibgarlik) 2-qismi “b” bandi va 211-moddasi (pora berish) 1-qismi bilan jinoyat ishi qo‘zg‘atilgan. M.J. va B.M.ga nisbatan qamoqqa olish tarzida ehtiyot chorasi qo‘llanilgan.

Avvalroq Andijonda o‘z vazifasini bajarish uchun 4 ming dollar pora so‘ragan MIB xodimlari ushlangani to‘g‘risida xabar berilgandi. Mazkur holat sabab MIBning Andijon shahar va Andijon tuman bo‘lim boshliqlari lavozimlaridan ozod qilingandi.