7 февраль куни Тошкент вилояти ҳокимининг биринчи ўринбосари лавозимига тайинланган Холмирза Ниёзов 12 февраль куни соат 07:00 га вилоятдаги туман ҳокимлари, бошқарма ва ташкилотлар раҳбарларини йиғилишга чақирди. Ижтимоий тармоқларда тарқалган хатда президент қарори ижроси юзасидан селектор йиғилиши экани қайд этилган. Бандлик ва меҳнат муносабатлари вазирлиги мазкур ҳолатга муносабат билдириб, Давлат меҳнат инспекцияси жойига чиқиб ўрганганини маълум қилди.
Хатда вилоят ҳокимлиги студиясидан вилоят ҳокимининг ўринбосарлари, вилоят прокурори, ИИББ ва ДСБ бошлиқлари, Қишлоқ ва сув хўжалиги котибиятига кирувчи бошқармалар, Маҳаллабай ишлаш ва тадбиркорликни ривожлантириш агентлиги, Кадастр агентлиги, ДХА ва бошқалар қатнашиши ёзилган. Туманлар ҳокимликлари студиясидан эса 4 та сектор раҳбарлари, туман ҳокимининг ўринбосарлари ва бошқа давлат ташкилотлари раҳбарлари иштирок этиши қайд этилган.
Меҳнат вазирлигининг маълум қилишича, 12 февраль куни эрталаб ушбу вазиятга аниқлик киритиш мақсадида, вазирлик Давлат меҳнат инспекцияси бошлиғи Қудратулло Одинаев Тошкент вилояти ҳокимлигига борган. «Инспекция ходимлари соат 07:10 атрофида ҳокимият биносига кириб борганда, мажлис ўтказилаётганини аниқлади. Бироқ йиғилганлар вазирлик вакилларини кўриши билан мажлисдан чиқиб кетишган», — дейилади хабарда.
Мазкур ҳолатда Маъмурий жавобгарлик тўғрисидаги кодекснинг 49-моддаси 1-қисмида (меҳнат ва меҳнатни муҳофаза қилиш тўғрисидаги қонунчиликни бузиш) кўрсатилган маъмурий ҳуқуқбузарлик аломатлари мавжуд экани айтилмоқда. Ушбу моддага кўра, мансабдорнинг меҳнат қонунчилигини бузиши БҲМнинг 5 бараваридан 10 бараваригача (1,35 миллион сўмдан — 2,7 миллион сўмгача) миқдорда жарима солишга сабаб бўлади.
Эслатиб ўтамиз, 2020 йил 14 январдан буён шу вақтга қадар Фарғона вилоятининг Олтиариқ тумани ҳокими вазифасида ишлаб келган Холмирза Ниёзов 7 февраль куни Тошкент вилояти ҳокимининг қишлоқ ва сув хўжалиги масалалари бўйича биринчи ўринбосари сифатида таништирилганди.
Бош вазир Абдулла Арипов бир неча бор таъкидланганига қарамай, давлат идораларидаги ёпиқ залларда 2-3 соатлаб мажлислар ўтказилаётганини танқид қилганди. Президент Шавкат Мирзиёев 2021 йилнинг январь ойида ўтказилган видеоселектор йиғилишида мажлисбозликни камайтириш шартлигини қатъий таъкидлаган эди.
Изоҳ (0)