АҚШнинг Ўзбекистондаги элчиси Дэниэл Розенблюм 9 февраль куни мамлакат аҳолисини Алишер Навоий таваллудининг 581 йиллиги билан табриклади. Розенблюмнинг ўзбек тилида билдирган табриги элчихонанинг ижтимоий тармоқлардаги саҳифаларида эълон қилинди.
«Ассалому алайкум, азиз дўстларим. АҚШ халқи номидан Ўзбекистон халқига ҳамда барча чин шеърият мухлисларига буюк шоир ва муаллим Алишер Навоий таваллуди муносабати билан энг самимий тилакларимни йўллайман. Ўзбек адабиётидаги ёрқин қуёш сифатида Алишер Навоий узоқ асрлар оша инсоният тафаккурини бойитиш ва қалбларга нур улашишда давом этаверади», — дейди элчи.
Дэниэл Розенблюм, шунингдек, ўз табриги охирида Алишер Навоийнинг «Ҳайрат ул-аброр» асаридан тўрт қатор ўқиб берган.
Эслатиб ўтамиз, АҚШ элчиси 2020 йилда Ўзбекистон мустақиллигининг 29 йиллиги муносабати билан ўзбек тилида табрик йўллаган эди. 2021 йилнинг 21 октябри — Ўзбек тили байрами билан шу тилда табриклаб, табрик охирида Ҳамид Олимжоннинг «Ўзбекистон» шеъридан тўрт қатор ўқиб берганди.
Изоҳ (0)