Президент Шавкат Мирзиёев «Ўзбекистон Республикасида чорвачилик соҳаси ва унинг тармоқларини ривожлантириш бўйича 2022-2026 йилларга мўлжалланган дастурни тасдиқлаш тўғрисида»ги қарорни имзолади, деб хабар беради ЎзА.
Қарор мамлакатда чорвачилик маҳсулотлари ишлаб чиқаришни кўпайтириш ҳисобига озиқ-овқат хавфсизлигини таъминлаш, ишлаб чиқаришнинг замонавий усулларини кенг жорий этиш, бу орқали қўшилган қиймат занжирини яратиш мақсадида қабул қилинган.
Ҳужжатга билан Инвестициялар ва ташқи савдо вазирлигига Ветеринария ва чорвачиликни ривожлантириш давлат қўмитаси, Молия вазирлиги ҳамда манфаатдор вазирлик ва идоралар билан биргаликда чорвачилик ва унинг тармоқларини ривожлантириш мақсадлари учун 2022 йилда Жаҳон банкининг 300 миллион доллар миқдоридаги кредит маблағларини жалб этиш чораларини кўриш вазифаси қўйилган.
Шунингдек, қарорда Ветеринария ва чорвачиликни ривожлантириш давлат қўмитасининг «Ветеринария фидойиси» ва «Чорвачилик фидокори» кўкрак нишонларини таъсис этиш тўғрисидаги таклифи маъқулланган.
Эслатиб ўтамиз, Қозоғистоннинг Ташқи савдо сиёсати ва халқаро иқтисодий ташкилотларда иштирок этиш масалалари бўйича Идоралараро комиссиясининг қарорига мувофиқ, 2021 йил 15 декабрдан 6 ой муддатга тирик қорамол экспортига тақиқ жорий қилинганди. Шу муносабат билан Ўзбекистон Ветеринария ва чорвачиликни ривожлантириш давлат қўмитаси фаолияти чорва ҳайвонларини импорт қилиш билан боғлиқ бўлган хўжалик юритувчи субъектларга турли иқтисодий муаммолар ва кутилмаган зарарлар олдини олиш мақсадида тавсиялар эълон қилган эди.
Изоҳ (0)