AQShning O‘zbekistondagi elchisi Deniel Rozenblyum 9-fevral kuni mamlakat aholisini Alisher Navoiy tavalludining 581 yilligi bilan tabrikladi. Rozenblyumning o‘zbek tilida bildirgan tabrigi elchixonaning ijtimoiy tarmoqlardagi sahifalarida e’lon qilindi.
“Assalomu alaykum, aziz do‘stlarim. AQSh xalqi nomidan O‘zbekiston xalqiga hamda barcha chin she’riyat muxlislariga buyuk shoir va muallim Alisher Navoiy tavalludi munosabati bilan eng samimiy tilaklarimni yo‘llayman. O‘zbek adabiyotidagi yorqin quyosh sifatida Alisher Navoiy uzoq asrlar osha insoniyat tafakkurini boyitish va qalblarga nur ulashishda davom etaveradi”, — deydi elchi.
Deniel Rozenblyum, shuningdek, o‘z tabrigi oxirida Alisher Navoiyning “Hayrat ul-abror” asaridan to‘rt qator o‘qib bergan.
Eslatib o‘tamiz, AQSh elchisi 2020-yilda O‘zbekiston mustaqilligining 29 yilligi munosabati bilan o‘zbek tilida tabrik yo‘llagan edi. 2021-yilning 21-oktabri — O‘zbek tili bayrami bilan shu tilda tabriklab, tabrik oxirida Hamid Olimjonning “O‘zbekiston” she’ridan to‘rt qator o‘qib bergandi.
Izoh (0)