Ижтимоий тармоқларда Бухоро вилояти ҳокими дам олиш куни учта туманда йиғилиш ўтказгани тўғрисида хабарлар тарқалди. Вилоят Бандлик бош бошқармаси Давлат меҳнат инспекцияси томонидан мазкур ҳолат юзасидан ўрганиш ўтказилди, деб хабар беради Бандлик ва меҳнат муносабатлари вазирлиги.
Ўрганиш давомида Бухоро вилояти ҳокими томонидан 2022 йил 6 февраль куни (якшанба дам олиш кунида) Бухоро, Вобкент, Ғиждувон ва Шофиркон туманларида учрашув ўтказилгани сабабли меҳнат тўғрисидаги қонунчилик талаблари бузилгани аниқланган.
Қонун бузилиш ҳолатларини бартараф этиш ва келгусида йўл қўймаслик, дам олиш кунлари ишга жалб этилган ходимларга икки ҳисса миқдорида ҳақ тўланиши ёки ходимнинг истагига қараб бошқа дам олиш куни («отгул») бериш бўйича Бухоро вилояти Бандлик бош бошқармаси Давлат меҳнат инспекцияси томонидан ёзма кўрсатма ва вазирлик Давлат меҳнат инспекцияси раҳбари томонидан вилоят ҳокими номига тақдимнома киритилган.
Аввалроқ бош вазир Абдулла Арипов бир неча бор таъкидланганига қарамай, давлат идораларидаги ёпиқ залларда 2-3 соатлаб мажлислар ўтказилаётганини танқид қилганди. Президент Шавкат Мирзиёев 2021 йилнинг январь ойида ўтказилган видеоселектор йиғилишида мажлисбозликни камайтириш шартлигини қатъий таъкидлаган эди.
Изоҳ (0)