Қорақалпоғистон Республикаси ҳудудидан ўтган 4Р-180 автомобиль йўлида машинаси бузилиб қолгани сабабли қолиб кетган йўловчилар қутқариб олинди. Бу ҳақда Автомобиль йўллари қўмитаси «Дарё»га маълум қилди.
Маълум қилинишича, Қорақалпоғистон Республикаси Автомобиль йўллари бош бошқармасига бош бошқарма балансидаги автомобиль йўлида фуқаролар қолиб кетгани тўғрисида хабар келиб тушган.
Ушбу автомобиль йўли республика аҳамиятидаги 4Р-180 Учқудуқ ш.—Саркеш қ.—Ашибузан қ.—Чуқуркак овули—Балиқбой ш/х—Қораўзак—Кегайли автомобиль йўли ҳисобланиб, қисқа вақт ичида чақирув жойига Фавқулодда вазиятлар бошқармаси, Ички ишлар вазирлиги, «Ҳудудий газ тармоқлари» ва Қорақалпоғистон Республикаси йўллардан мунтазам фойдаланиш унитар корхонаси ходимлари етиб борган.
Аниқланишича, ёрдам сўраб мурожаат қилган фуқаролар автомашиналари бузилгани сабаб қолиб кетган. Воқеа жойидан 31 ва 39 ёшли фуқаролар қутқариб олинган. Шунингдек, йўлда ботиб қолган бир нечта машиналарга амалий ёрдам кўрсатилган.
«Ҳурматли фуқаролар, ҳозиргидек об-ҳаво шароитида узоқ йўлга чиқмаслигингизни сўраймиз. Агарда узоқ йўлга чиқиб, қайтиб келмаган ёки боғланиш имконияти бўлмаётган яқинларингиз бўлса, бошқарманинг 1050 ёки 101 рақамларига қўнғироқ қилинг», — дейилади Қорақалпоғистон Республикаси Фавқулодда вазиятлар бошқармаси хабарида.
Аввалроқ Нурафшонда кўп қаватли уйнинг оралиқ қисмига тушиб кетган фуқаронинг ҳаёти сақлаб қолингани, Нукусда вояга етмаган икки бола муз остига тушиб кетгани, Сурхондарёда ёнғин бўлаётган уйдан 5 киши қутқариб олингани тўғрисида хабар берилганди.
Изоҳ (0)