Наманганда фан олимпиадасида ғолиб бўлган ўқувчи ўзига берилган ноутбукни ўқитувчилар тортиб олганини айтган эди. Вилоят Халқ таълими бошқармаси ҳолат юзасидан ўтказилган ўрганиш ишлари натижасини маълум қилиб, мактаб директори ва ўқувчининг синф раҳбарига чора кўрилганини билдирди.

Фото: Facebook

22 январь куни Норин туманидаги 1-мактаб ўқувчиси Муроджон Эргашалиев республика миқёсида ўтказилган онлайн олимпиадада математика фани бўйича фахрли 1-ўринни қўлга киритгани муносабати билан Халқ таълими вазирлиги унга ноутбук совға қилгани, лекин ноутбукни мактаб ўқитувчилари тортиб олганини маълум қилиб видеомурожаат йўллаган.

Мазкур ҳолат бўйича ўрганиш ўтказилиб, шу куннинг ўзида ноутбук Муроджон Эргашалиевга қайтариб берилган ва шу ҳақида ижтимоий тармоқлар орқали муносабат билдирилган.

Таъкидланишича, вилоят халқ таълими бошқармаси томонидан Норин туман халқ таълими бўлими ҳамда 1-сонли мактаб фаолияти юзасидан хизмат текшируви ўтказилиб, 1-сонли мактаб директори Нозимжон Хусанов, ўқувчининг синф раҳбари Санобар Хожимуродова эгаллаб турган лавозимидан озод этилган.

«Юқоридаги ҳолат бўйича, камчиликларга йўл қўйгани сабаб Норин туман халқ таълими бўлими мудири Жавлонбек Нурмухҳаммадовдан тушунтириш хати олиниб, тегишли интизомий жазо чораси қўллаш бўйича халқ таълими вазирига хат киритилди», — дейилади хабарда.

Эслатиб ўтамиз, аввалроқ Нуробод туманининг 41-умумтаълим мактабининг 8-синф ўқувчиси Сардор Сатторов «Бир миллион ўзбек дастурчилари» лойиҳасининг вилоят босқичида 1-ўринни олишига қарамай, унга 3-даражали диплом ҳамда ишлатилган (эски) ноутбук совға қилинган ҳақида хабар берилганди. «Бу номардлар эскини бергунча битта китоб билан диплом берса бўлмасмиди? Чангини ҳам артмаган буни, ким билан неча йилдан бери чанг босиб ётган. Шунчалик ҳам номардлик бўладими?», — дейди ўқувчининг бобоси.

Нуробод тумани ҳокимининг фармойиши билан мазкур ҳолатда масъулиятсизликка йўл қўйган ҳоким ўринбосарига ҳайфсан берилди, кейинроқ ишдан бўшатилди. Ўқувчига берилган эски ноутбук янгисига алмаштириб берилди.